విద్యార్థులకు విద్యా కిట్లు పంపిణీ

నగరం, మేజర్ న్యూస్: వరుస తుఫానులకు విద్యార్థుల పుస్తకాలు, విద్యా సామాగ్రి దెబ్బతిన్న విషయాన్ని గుర్తించి అమెజాన్ సంస్థ సహకారంతో డొనేట్ కార్ట్ ఫౌండేషన్ ద్వారా సమకూర్చిన విద్యా కిట్లను శనివారం మండల కేంద్రమైన నగరం ఎస్టీ కాలనీలో 25 మంది విద్యార్థులకు స్థానిక సిఫార్డ్ సంస్థ డైరెక్టర్ కె. రవి ప్రదీప్ అందజేశారు. బాలల దినోత్సవాన్ని పురస్కరించుకొని విద్యార్థులకు కిట్లను పంపిణీ చేశారు. అలాగే నిజాంపట్నం మండలంలో 115 మంది విద్యార్థులకు లెదర్ బ్యాగు, వాటర్ బాటిల్, స్కెచ్ పెన్ల సెట్టు, నోట్ బుక్స్ తో కూడిన కిట్లను పంపిణీ చేశామని రవి ప్రదీప్ అన్నారు. తొలుత జవహర్ లాల్ నెహ్రూ చిత్రపటానికి పూలమాలవేసి నివాళులర్పించారు. కార్యక్రమంలో కమ్యూనిటీ ఆర్గనైజర్ కొమరగిరి నాగేశ్వరరావు, ఏరియా కోఆర్డినేటర్ డాక్టర్ ఐ. శ్రీనివాసరావు, పి. రామకృష్ణ, పి. జ్యోతి, దేవయ్య, రెమిడీయల్ టీచర్స్ పాల్గొన్నారు.