గిగ్ కార్మికులకు భరోసా.. సామాజిక భద్రతకు కాంగ్రెస్ ప్రభుత్వం పెద్దపీట -రూ.5 లక్షల ప్రమాద బీమా,రూ.10 లక్షల ఆరోగ్య బీమా

పటాన్‌చెరు, ; గిగ్, ప్లాట్‌ఫాం కార్మికులకు సామాజిక భద్రత కల్పించేలా తెలంగాణ ప్రభుత్వం నూతన చట్టాన్ని రూపొందించడం అభినందనీయమని సంగారెడ్డి జిల్లా ఐఎన్‌టీయూసీ నాయకులు, పటాన్‌చెరు పట్టణ కాంగ్రెస్ కమిటీ అధ్యక్షుడు కొల్కూరి నరసింహ రెడ్డి అన్నారు.శనివారం శిల్పారామం వద్ద ముఖ్యమంత్రి రేవంత్ రెడ్డి, పార్లమెంట్ ప్రతిపక్ష నేత రాహుల్ గాంధీ, కార్మిక శాఖ మంత్రి డాక్టర్ వివేక్ వెంకటస్వామి ఆధ్వర్యంలో గిగ్ వర్కర్లకు చట్టబద్ధమైన రక్షణ కల్పించే కార్యక్రమం నిర్వహించారు. ఈ సందర్భంగా సుమారు ఆరు లక్షల మంది గిగ్ కార్మికులకు సామాజిక భద్రత కల్పించే లక్ష్యంతో ప్రభుత్వం చేపట్టిన చర్యలను వివరించారు.ఈ పథకం ద్వారా కార్మికులకు రూ.5 లక్షల ప్రమాద బీమా, రూ.10 లక్షల ఆరోగ్య బీమాతో పాటు వైఫై సదుపాయాలతో కూడిన విశ్రాంతి కేంద్రాలు ఏర్పాటు చేయనున్నట్లు తెలిపారు.కార్మికుల శ్రమకు గౌరవం, వారి కుటుంబాలకు ఆర్థిక భరోసా కల్పించడమే లక్ష్యమన్నారు.ఈ కార్యక్రమంలో సైబరాబాద్ వెస్ట్ జోన్ పరిధి నుంచి సుమారు 200 మంది కార్మికులతో కలిసి కొల్కూరి నరసింహ రెడ్డి పాల్గొన్నారు. ఈ సందర్భంగా కాంగ్రెస్ ప్రభుత్వం, ముఖ్యమంత్రి రేవంత్ రెడ్డి, రాహుల్ గాంధీ, మంత్రి వివేక్ వెంకటస్వామి, అఖిల భారత ఐఎన్‌టీయూసీ అధ్యక్షుడు డాక్టర్ జి. సంజీవ రెడ్డికి ప్రత్యేక కృతజ్ఞతలు తెలిపారు.ఈ కార్యక్రమంలో కార్మిక సంఘం నాయకులు అమర్ సింహా రెడ్డి, రతన్, రవి గౌడ్,అక్షిత్,మహేష్ తదితరులు పాల్గొన్నారు.