వెల్దుర్తి సర్పంచ్ అభ్యర్థిగా బొమ్మన రామకాంత్ రెడ్డి నామినేషన్
వెల్దుర్తి, రూలర్ న్యూస్: స్థానిక సంస్థల ఎన్నికల నేపథ్యంలో వెల్దుర్తి మేజర్ గ్రామపంచాయతీ సర్పంచ్ పదవికి బొమ్మన రామకాంత్ రెడ్డి శనివారం తన నామినేషన్ను దాఖలు చేశారు. గ్రామ సచివాలయ కార్యాలయంలో ఏర్పాటు చేసిన ఎన్నికల రిటర్నింగ్ అధికారి కార్యాలయంలో ఆయన తన నామినేషన్ పత్రాలను సమర్పించారు. అంతకుముందు పార్టీ నాయకులు, కార్యకర్తలు, అభిమానులు మరియు కుటుంబ సభ్యులతో కలిసి ఆయన అట్టహాసంగా కార్యాలయానికి చేరుకున్నారు. రిటర్నింగ్ అధికారికి నామినేషన్ పత్రాలను అందజేసిన అనంతరం ఎన్నికల నియమావళికి అనుగుణంగా సంబంధిత ధ్రువీకరణ పత్రాలను పూర్తి చేశారు. ఈ సందర్భంగా బొమ్మన రామకాంత్ రెడ్డి మాట్లాడుతూ, వెల్దుర్తి మేజర్ గ్రామపంచాయతీ సమగ్ర అభివృద్ధే లక్ష్యంగా తాను ఎన్నికల బరిలోకి దిగుతున్నట్లు తెలిపారు. గ్రామంలో మౌలిక వసతుల కల్పన, పారిశుద్ధ్యం, తాగునీటి సమస్యల పరిష్కారానికి అత్యంత ప్రాధాన్యత ఇస్తానని పేర్కొన్నారు. ప్రజలందరూ తనను ఆశీర్వదించి, భారీ మెజారిటీతో గెలిపించాలని ఆయన విజ్ఞప్తి చేశారు.ఈ నామినేషన్ కార్యక్రమంలో పలువురు స్థానిక ముఖ్య నాయకులు, ప్రజాప్రతినిధులు, కార్యకర్తలు మరియు గ్రామ పెద్దలు పెద్ద సంఖ్యలో పాల్గొని ఆయనకు తమ సంపూర్ణ మద్దతును ప్రకటించారు.