వైసీపీ హయాంలో అభివృద్ధి కనబడలేదా? కూటమి ప్రభుత్వానికి అభివృద్ధి కార్యక్రమాలు కనిపించడం లేదా..! కేవలం ఆర్భాటాలకే పరిమితమయ్యారంటూ విమర్శలు సింగనమల మాజీ సమన్వయకర్త వీరాంజనేయులు

అనంతపురం బ్యూరో : వైఎస్సార్ కాంగ్రెస్ పార్టీ ప్రభుత్వ హయాంలో సింగనమల నియోజకవర్గంలో చేపట్టిన అభివృద్ధి కార్యక్రమాలు కూటమి ప్రభుత్వానికి, నాయకులకు కనిపించడం లేదా అని సింగనమల మాజీ సమన్వయకర్త వీరాంజనేయులు ప్రశ్నించారు. కూటమి ప్రభుత్వం అధికారంలోకి వచ్చి రెండున్నరేళ్లు కావస్తున్నా నియోజకవర్గంలో చెప్పుకోదగిన అభివృద్ధి ఎక్కడ జరిగిందో చూపించాలని ఆయన డిమాండ్ చేశారు.

బుధవారం సింగనమలలోని వైఎస్సార్ కాంగ్రెస్ పార్టీ కార్యాలయంలో నిర్వహించిన విలేకరుల సమావేశంలో వీరాంజనేయులు మాట్లాడారు. గత వైసీపీ ప్రభుత్వ ఐదేళ్ల పాలనలో మాజీ ఎమ్మెల్యే జొన్నలగడ్డ పద్మావతి ఆధ్వర్యంలో నియోజకవర్గంలో పలు అభివృద్ధి పనులు చేపట్టినట్లు ఆయన తెలిపారు.

సింగనమల చెరువును లోకలైజేషన్ చేసి ఒక టీఎంసీ నీటి కేటాయింపు చేయడంతో పాటు ఎల్లనూరు, పుట్లూరు మండలాల పరిధిలోని చెరువులకు నీటిని అందించే చర్యలు చేపట్టామని పేర్కొన్నారు. తద్వారా సాగు, తాగునీటి అవసరాల పరిష్కారానికి చర్యలు తీసుకున్నామని తెలిపారు.

అలాగే నాడు–నేడు కార్యక్రమం ద్వారా ప్రభుత్వ పాఠశాలల రూపురేఖలు మార్చి, ఇంగ్లిష్ మీడియం విద్యను అందుబాటులోకి తీసుకొచ్చామని వీరాంజనేయులు పేర్కొన్నారు. ప్రతి పంచాయతీకి గ్రామ సచివాలయం, రైతు భరోసా కేంద్రం, వైఎస్సార్ హెల్త్ క్లినిక్‌ల ఏర్పాటుతో పాటు మండల స్థాయిలో ఆరోగ్య కేంద్రాల నిర్మాణం చేపట్టినట్లు వివరించారు.

తరిమెల గ్రామం వద్ద పెన్నా నదిపై వంతెన నిర్మాణం, నాయనవారిపల్లి–పోతురాజు కాలువ నుంచి సలకం చెరువుకు నీటి వసతి, సింగనమల నుంచి గార్లదిన్నెతో పాటు పలు గ్రామాలకు రహదారుల నిర్మాణం వంటి పనులు చేపట్టామని ఆయన తెలిపారు.

“ఈ అభివృద్ధి కార్యక్రమాలు కూటమి నాయకులకు కనిపించడం లేదా? లేక కళ్లుమూసుకుని ఉన్నారా?” అని వీరాంజనేయులు ప్రశ్నించారు. కూటమి ప్రభుత్వం అధికారంలోకి వచ్చిన తర్వాత నియోజకవర్గంలో ఎక్కడెక్కడ అభివృద్ధి పనులు చేపట్టారో ప్రజలకు వివరించాలని డిమాండ్ చేశారు.

కేవలం ఆర్భాటాలు, ప్రచార కార్యక్రమాలకే పరిమితమవుతున్నారని కూటమి ప్రభుత్వంపై ఆయన విమర్శలు చేశారు. అభివృద్ధి విషయంలో మాత్రం శూన్యంగా ఉందని ఎద్దేవా చేశారు.

ఈ సమావేశంలో సింగనమల నియోజకవర్గ యూత్ కన్వీనర్ దిద్దుకుంట భాస్కర్‌రెడ్డి, తిరుపతయ్య, వీరనారాయణ, నాగేంద్ర, సాయినాథ్‌రెడ్డి తదితరులు పాల్గొన్నారు.

రిపోర్టర్ : మొయినుద్దీన్, అనంతపురం బ్యూరో, అనంతపురం.