తెలుగుదేశం పార్టీకి గోవిందరావు చేసిన సేవలు చిరస్మరణీయం

రాజాం, సూర్య : తెలుగుదేశం పార్టీ ఆవిర్భావం నుంచి పార్టీ అభివృద్ధి, పటిష్టతే ధ్యేయంగా అంకితభావంతో పనిచేసిన సీనియర్ నాయకులు, పీఏసీఎస్ అధ్యక్షులు స్వర్గీయ వంగా గోవిందరావు సేవలు పార్టీ చరిత్రలో చిరస్థాయిగా నిలిచిపోతాయని రాజాం నియోజకవర్గ సీనియర్ తెలుగుదేశం పార్టీ నాయకులు కోండ్రు జగదీష్ అన్నారు. రాజాం మండలం ఓమ్మి గ్రామంలో నిర్వహించిన వంగా గోవిందరావు పెద్దకర్మ కార్యక్రమానికి కోండ్రు జగదీష్ హాజరయ్యారు. ఈ సందర్భంగా ఆయన చిత్రపటానికి పూలమాలలు వేసి ఘన నివాళులర్పించారు.ఆయన కుమారుడు,రాజీపేట ఏకగ్రీవ ఎంపీటీసీ వంగా వెంకటరావుని, ఆయన కుటుంబ సభ్యులను పరామర్శించి ప్రగాఢ సానుభూతిని తెలియజేశారు. ఈ సందర్భంగా కోండ్రు జగదీష్ మాట్లాడుతూ రాజకీయ పరిస్థితులు ఎలా మారినా పార్టీ సిద్ధాంతాల పట్ల విశ్వాసం, క్రమశిక్షణ, అంకితభావంతో తెలుగుదేశం పార్టీకి అండగా నిలిచిన నాయకుడు గోవిందరావు అని కొనియాడారు. సుదీర్ఘ కాలంపాటు పార్టీ అభ్యున్నతికి, సంస్థాగత బలోపేతానికి ఆయన చేసిన కృషి వెలకట్టలేనిదని పేర్కొన్నారు. ఈ కార్యక్రమంలో కూటమి నాయకులు, కార్యకర్తలు, అభిమానులు పాల్గొన్నారు.