తల్పగిరి రంగనాధ స్వామి ఆలయంలో వైభవంగా చిలుక ద్వాదశి వేడుక
నెల్లూరు కల్చరల్ మేజర్ న్యూస్
నెల్లూరు రంగనాయకులపేటలోని శ్రీ తల్పగిరి రంగనాధ స్వామి దేవస్థానంలో శనివారం చిలుక ద్వాదశి వేడుకలు అత్యంత వైభవంగా నిర్వహించారు. ఉత్సవాల్లో భాగంగా ఉదయం శ్రీదేవి, భూదేవి సమేతంగా శ్రీ రంగనాధ స్వామికి శాస్త్రోక్తంగా తిరుమంజనం జరిపారు.
సాయంత్రం శ్రీ రంగనాధ స్వామి వారు బంగారు గరుడసేవపై పేట ఉత్సవంలో భాగంగా ఉత్తరాధి మఠం (శ్రీ ఆంజనేయ స్వామి వారి దేవస్థానం) వద్దకు వేంచేశారు. అక్కడ శ్రీ రంగనాధ స్వామికి, శ్రీ తులసి అమ్మవారికి అర్చకులు వేదమంత్రోచ్ఛరణల మధ్య తులసి కల్యాణాన్ని అత్యంత వైభవంగా నిర్వహించారు. కల్యాణోత్సవం అనంతరం శ్రీ రంగనాధ స్వామి వారి పేట ఉత్సవం భక్తిశ్రద్ధలతో సాగింది. ఈ వేడుకలకు కీ.శే. వేముగుంట రాఘవేంద్ర రావు కుమారులు ఉభయకర్తలుగా వ్యవహరించారు.
ఈ కార్యక్రమంలో దేవస్థాన కార్యనిర్వహణాధికారి ఆళ్ళ శ్రీనివాస రెడ్డి, దేవస్థాన చైర్మన్ లెక్కల వెంకట రెడ్డి, ధర్మకర్తల మండలి సభ్యులు, ఎక్స్-అఫీషియో మెంబర్ ఈ. దొరస్వామితో పాటు దేవస్థానం అర్చకులు, సిబ్బంది, భక్తులు పెద్ద సంఖ్యలో పాల్గొన్నారు.