పెంచలకోనలో వైభవంగా చిలుక ద్వాదశి ఉత్సవాలు
రాపూరు మండలంలోని ప్రముఖ పుణ్యక్షేత్రమైన పెంచలకోనలో శనివారం చిలుక ద్వాదశి ఉత్సవాలు అత్యంత వైభవంగా జరిగాయి. ఈ సందర్భంగా ఉదయం శ్రీ పెనుశిల లక్ష్మీ నరసింహ స్వామికి ప్రత్యేక అభిషేకం నిర్వహించారు. అనంతరం శ్రీ ఆదిలక్ష్మి అమ్మవారి ఆలయంలో అష్టోత్తర శత కలశాభిషేకం, సాలగ్రామ ధాత్రి పూజలు, హోమం శాస్త్రోక్తంగా జరిగాయి. మధ్యాహ్నం నిర్వహించిన వన భోజన కార్యక్రమంలో భక్తులు అధిక సంఖ్యలో పాల్గొని శ్రీవారి ప్రసాదాలను స్వీకరించారు.
సాయంత్రం శ్రీ చెంచులక్ష్మి ఆదిలక్ష్మి సమేత శ్రీ పెనుశిల లక్ష్మీ నరసింహ స్వామికి బంగారు గరుడ సేవ కన్నులపండువగా సాగింది. ఆస్థానం అనంతరం భక్తులు సమర్పించిన 100 గొడుగులతో క్షేత్రోత్సవాన్ని ప్రధానార్చకులు, వేదపండితుల మంత్రోచ్ఛరణలు, మంగళ వాయిద్యాలు, గోవింద నామ స్మరణల మధ్య భక్తిశ్రద్ధలతో నిర్వహించారు. భక్తుల రద్దీని దృష్టిలో ఉంచుకుని దేవస్థానం ఉప కమిషనర్, కార్యనిర్వహణాధికారి కోవూరు జనార్దన రెడ్డి ప్రత్యక్ష పర్యవేక్షణలో క్యూలైన్ల ఏర్పాట్లు, త్రాగునీటి సరఫరా, అన్నదానం తదితర సౌకర్యాలను ఎటువంటి లోటుపాట్లు లేకుండా నిర్వహించారు. చిలుక ద్వాదశి సందర్భంగా శనివారం దేవస్థానానికి భక్తుల ద్వారా మొత్తం రూ. 4,54,825/- ఆదాయం సమకూరిందని అధికారులు వెల్లడించారు. ఈ మొత్తం ఆదాయాన్ని పెంచలకోనలోని ఆంధ్రప్రదేశ్ గ్రామీణ బ్యాంకులో జమ చేసినట్లు దేవస్థానం ఉప కమిషనర్ కోవూరు జనార్దన రెడ్డి పేర్కొన్నారు.