సిద్ధార్థలో షటిల్ సమరం.. సత్తా చాటేందుకు 40 జట్ల పోటీ
విజయవాడ స్పోర్ట్స్, మేజర్ న్యూస్ : విజయవాడలోని సిద్ధార్థ అకాడమీ ఆఫ్ హయ్యర్ ఎడ్యుకేషన్ వై.వి. రావు సిద్ధార్థ స్పోర్ట్స్ కాంప్లెక్స్‌లో జేఎన్‌టీయూకే అంతర్ కళాశాల సెంట్రల్ జోన్ షటిల్ బ్యాడ్మింటన్ పురుషుల, మహిళల టోర్నమెంట్, ఎంపిక పోటీలు ఘనంగా ప్రారంభమయ్యాయి. సిద్ధార్థ అకాడమీ ప్రోవైస్ చాన్సలర్, వీఆర్‌ఎస్‌ఈసీ ప్రిన్సిపల్ ప్రొఫెసర్ ఎ.వి. రత్న ప్రసాద్ ముఖ్య అతిథిగా హాజరై టోర్నమెంట్‌ను ప్రారంభించారు. విద్యార్థుల సమగ్ర అభివృద్ధిలో క్రీడలు కీలక పాత్ర పోషిస్తాయని, క్రీడాకారులు క్రమశిక్షణ, ఆత్మవిశ్వాసం, క్రీడాస్ఫూర్తితో పోటీల్లో పాల్గొనాలని ఆయన సూచించారు. అకాడమీ రిజిస్ట్రార్ డా. ఎం. రవిచంద్ క్రీడాకారులు, జట్లకు శుభాకాంక్షలు తెలిపారు. టోర్నమెంట్‌లో 26 పురుషుల జట్లు, 14 మహిళల జట్లతో మొత్తం 40 జట్లు పాల్గొంటున్నాయి. క్రీడాకారులు, అధికారులకు న్యాయమైన పోటీతో పాటు ఆహ్లాదకరమైన క్రీడా వాతావరణం కల్పించేందుకు అవసరమైన అన్ని ఏర్పాట్లు చేసినట్లు నిర్వాహకులు తెలిపారు. కార్యక్రమంలో ఫిజికల్ డైరెక్టర్, నిర్వహణ కార్యదర్శి పి. రఘు, అధికారులు, కోచ్‌లు, జట్టు నిర్వాహకులు, క్రీడాకారులు పాల్గొన్నారు. టోర్నమెంట్ నిర్వహణకు సహకరిస్తున్న జేఎన్‌టీయూకే క్రీడా బోర్డు, విద్యాసంస్థలు, యూనివర్సిటీ యాజమాన్యానికి రఘు కృతజ్ఞతలు తెలిపారు.
✍️ప్రేమ్ రాజ్, విజయవాడ, ఎన్టీఆర్ జిల్లా.
