శోభాయమానంగా దక్షిణామూర్తి ప్రాకారోత్సవం

 అత్యంత వైభవంగా ప్రదోషకాల అభిషేక పూజ

నెల్లూరు కల్చరల్ మేజర్ న్యూస్  :   నెల్లూరు నగరంలోని చారిత్రాత్మక, ప్రసిద్ధ శైవక్షేత్రమైన శ్రీ భువనేశ్వరి సమేత శ్రీ మూలస్థానేశ్వర స్వామి వారి దేవస్థానంలో గురువారాన్ని పురస్కరించుకొని ఆధ్యాత్మిక కార్యక్రమాలు వైభవంగా జరిగాయి. గురు గ్రహ దోష నివారణకు, జ్ఞాన ప్రాప్తికి ఆరాధ్యుడైన దక్షిణామూర్తి స్వామికి విశేష పూజలతో పాటు ఆలయ ప్రాకారోత్సవాన్ని అత్యంత భక్తిశ్రద్ధలతో నిర్వహించారు.గురువారం ఉదయం స్వామివారికి విశేష అభిషేకాలు, అర్చనలు చేసిన అనంతరం, ఉత్సవమూర్తిని సర్వాంగ సుందరంగా అలంకరించారు. మేళతాళాలు, వేద పండితుల మంత్రోచ్ఛారణల నడుమ స్వామివారి ఆలయ ప్రాకారోత్సవం కన్నుల పండువగా సాగింది. సాయంత్రం త్రయోదశి పర్వదినాన్ని పురస్కరించుకుని ప్రదోషకాల పూజలు అత్యంత వైభవంగా జరిగాయి. ఈ సందర్భంగా మూలస్థానేశ్వర స్వామికి, నందీశ్వర స్వామికి వేద పండితుల మంత్రోచ్ఛారణల నడుమ వివిధ రకాల విశేష ద్రవ్యాలతో ఘనంగా అభిషేకాలు నిర్వహించారు. ఈ విశేష ఉత్సవాన్ని ఆలయ ఛైర్మన్ , పాలక మండలి సభ్యులు, సహాయ కమిషనర్, కార్యనిర్వహణాధికారి ఏవీ శ్రీనివాసులు రెడ్డి పర్యవేక్షణలో ఘనంగా నిర్వహించారు.