ఆస్తుల ఆరోపణలపై సిట్టింగ్ జడ్జితో విచారణ జరపాలి,నేషనల్ పీపుల్స్ పార్టీ రాష్ట్ర అధ్యక్షుడు గవ్వల భరత్ కుమార్ డిమాండ్

తెలంగాణ బ్యూరో ప్రతినిధిః  తెలంగాణ రాజకీయాల్లో అధికార, ప్రతిపక్ష నేతల కుటుంబాల ఆస్తులు, భూములు, వ్యాపార ప్రయోజనాలపై పరస్పరం వస్తున్న ఆరోపణలపై సమగ్ర విచారణ జరిపించాలని నేషనల్ పీపుల్స్ పార్టీ తెలంగాణ రాష్ట్ర అధ్యక్షుడు గవ్వల భరత్ కుమార్ డిమాండ్ చేశారు. ఆరోపణల్లో వాస్తవమెంత? రాజకీయ కక్షతో చేస్తున్న ఆరోపణలెంత? అన్నది తేల్చేందుకు తెలంగాణ హైకోర్టు సిట్టింగ్ జడ్జి ఆధ్వర్యంలో స్వతంత్ర విచారణ కమిటీని ఏర్పాటు చేయాలని కోరారు.
రాజకీయ నేతలు ఒకరిపై ఒకరు చేస్తున్న ఆరోపణలను వెంటనే నిజాలుగా పరిగణించలేమని, అదే సమయంలో వాటిని పూర్తిగా విస్మరించకూడదని భరత్ కుమార్ అన్నారు. అధికారిక రికార్డుల ఆధారంగా వాస్తవాలను నిగ్గు తేల్చాల్సిన అవసరం ఉందన్నారు. ఇటీవల బీజేపీ ఎంపీ మాధవనేని రఘునందన్‌రావు హైకోర్టు ప్రధాన న్యాయమూర్తిని కలిసి సిట్టింగ్ జడ్జితో విచారణ జరిపించాలని కోరడం ఈ అంశం తీవ్రతను తెలియజేస్తోందన్నారు.
వేల కోట్ల ఆస్తులపై ఆరోపణలు
ముఖ్యమంత్రి రేవంత్‌రెడ్డి, మాజీ ముఖ్యమంత్రి కేసీఆర్, బీఆర్‌ఎస్ వర్కింగ్ ప్రెసిడెంట్ కేటీఆర్ కుటుంబాల ఆస్తులపై ఇటీవలి కాలంలో పరస్పర ఆరోపణలు పెరిగిపోయాయని భరత్ కుమార్ పేర్కొన్నారు. కేసీఆర్ కుటుంబం సుమారు రూ.లక్ష కోట్ల విలువైన ఆస్తులు కూడబెట్టిందంటూ సీఎం రేవంత్‌రెడ్డి ఆరోపణలు చేసిన సందర్భాలు ఉన్నాయని, మరోవైపు రేవంత్‌రెడ్డి కుటుంబ ఆస్తులు, వ్యాపార వ్యవహారాలపై బీఆర్‌ఎస్ నేతలు భారీ మొత్తంలో ఆరోపణలు చేస్తున్నారని తెలిపారు.
ఇవన్నీ రాజకీయ ఆరోపణలేనని, కోర్టులు లేదా దర్యాప్తు సంస్థలు నిర్ధారించిన వాస్తవాలుగా పరిగణించరాదని స్పష్టం చేశారు. అందుకే స్వతంత్ర న్యాయ విచారణ ద్వారా నిజానిజాలను ప్రజల ముందుంచాలని డిమాండ్ చేశారు.
కేటీఆర్ కుటుంబానికి సంబంధించి హైదరాబాద్‌లో సుమారు 439.30 ఎకరాల భూములు ఉన్నాయంటూ ఆరోపణలు వచ్చాయని, అసెంబ్లీలో సుమారు 440 ఎకరాల భూమి ప్రస్తావన కూడా జరిగిందని భరత్ కుమార్ తెలిపారు. ఎర్రవల్లి ఫామ్‌హౌస్ పరిధిలో ప్రభుత్వ అసైన్డ్ భూములపై కూడా ఆరోపణలు వచ్చాయని, భూవిస్తీర్ణంపై భిన్నమైన లెక్కలు వినిపిస్తున్నాయని అన్నారు. అదేవిధంగా రేవంత్‌రెడ్డి కుటుంబ భూములపైనా బీఆర్‌ఎస్ నేతలు వివిధ ఆరోపణలు చేస్తున్నారని తెలిపారు. ఈ ఆరోపణల్లో పేర్కొంటున్న భూముల వివరాలను రిజిస్ట్రేషన్, రెవెన్యూ రికార్డులతో సరిపోల్చి వాస్తవాలను తేల్చాలని కోరారు.
రూ.200 కోట్ల భూమి వ్యవహారంపైనా దర్యాప్తు
సీఎం కుటుంబంతో సంబంధాలు ఉన్న వ్యక్తులతో అనుబంధమున్నట్లు ఆరోపణలు ఎదుర్కొంటున్న సంస్థకు సుమారు ఐదు ఎకరాల ప్రభుత్వ భూమిని రూ.200 కోట్ల విలువతో కేటాయించారన్న ఆరోపణలపైనా విచారణ జరపాలని భరత్ కుమార్ డిమాండ్ చేశారు. భూమి విలువ, అర్హతలు, కేటాయింపు ప్రక్రియ, లబ్ధిదారుల సంబంధాలు, ప్రభుత్వ నిర్ణయాల వెనుక ఉన్న కారణాలను విచారణ పరిధిలోకి తీసుకురావాలని కోరారు. ఎన్నికల సమయంలో ప్రజాప్రతినిధులు సమర్పించిన అఫిడవిట్లలో పేర్కొన్న ఆస్తులను ప్రస్తుతం ఉన్న ఆస్తులతో పోల్చి చూడాలని భరత్ కుమార్ సూచించారు. ఎన్నికల అఫిడవిట్లు, రిజిస్ట్రేషన్ రికార్డులు, రెవెన్యూ రికార్డులు, కంపెనీల వివరాలు, పన్ను రికార్డులు, బ్యాంకు లావాదేవీలు, షేర్‌హోల్డింగ్ వివరాలను సమగ్రంగా పరిశీలిస్తే ఆరోపణల వెనుక ఉన్న వాస్తవాలు వెలుగులోకి వస్తాయని అన్నారు. రాజకీయ ఆరోపణలకు శాశ్వతంగా ముగింపు పలికి ప్రజలకు వాస్తవాలు తెలియాలంటే హైకోర్టు సిట్టింగ్ జడ్జి ఆధ్వర్యంలో స్వతంత్ర విచారణ జరపడమే సరైన మార్గమని నేషనల్ పీపుల్స్ పార్టీ రాష్ట్ర అధ్యక్షుడు గవ్వల భరత్ కుమార్ స్పష్టం చేశారు.