సజావుగా పోలింగ్ నిర్వహించేందుకు పటిష్ట ఏర్పాట్లు ➖ జిల్లా ఎన్నికల అధికారి హిమాన్షు శుక్ల
నెల్లూరు, కార్పొరేషన్, మేజర్ న్యూస్ : మున్సిపల్ ఎన్నికల పోలింగ్‌కు పటిష్ట ఏర్పాట్లు చేపట్టినట్లు జిల్లా ఎన్నికల అధికారి, కలెక్టర్ హిమాన్షు శుక్లా పేర్కొన్నారు. ఆదివారం నెల్లూరు నగరపాలక సంస్థ, బుచ్చిరెడ్డిపాలెం, ఆత్మకూరు మున్సిపాలిటీలలో పోలింగ్ జరగనున్న నేపథ్యంలో శనివారం ఎన్నికల సామగ్రి అందించే డిస్ట్రిబ్యూషన్ కేంద్రాలను కలెక్టర్ పరిశీలించారు. బుచ్చిరెడ్డిపాలెంలోని డి ఎల్ ఎన్ ఆర్ హైస్కూల్లో ఏర్పాటు చేసిన రిసెప్షన్, డిస్ట్రిబ్యూషన్ కేంద్రాన్ని జిల్లా కలెక్టర్ హిమాన్షు శుక్ల పరిశీలించారు. పోలింగ్ ప్రక్రియలో పాల్గొనే ఎన్నికల సిబ్బందికి జిల్లా కలెక్టర్ ఈ సందర్భంగా పలు సూచనలు చేశారు. రాష్ట్ర ఎన్నికల సంఘం నిబంధనలను అనుసరించి పోలింగ్ ప్రక్రియను ఎటువంటి లోటుపాట్లు లేకుండా సమర్థవంతంగా నిర్వహించాలని అధికారులను ఆదేశించారు. బ్యాలెట్ బాక్సులు.. బ్యాలెట్ పేపర్లు, పోలింగ్ సామాగ్రిని ముందుగానే సరిచూసుకొని ఓటింగ్ ప్రక్రియ మొదలుపెట్టాలని సూచించారు. ప్రతి ఒక్క ఓటరు కూడా ప్రశాంత వాతావరణంలో స్వేచ్ఛగా ఓటు హక్కు వినియోగించుకునేలా పోలింగ్ కేంద్రాల్లో అన్ని ఏర్పాట్లు పూర్తి చేసినట్లు ఈ సందర్భంగా కలెక్టర్ చెప్పారు. కలెక్టర్ వెంట వివిధ శాఖల అధికారులు ఉన్నారు.
