గడపగడపకూ వెళ్లి ఓట్లు అభ్యర్థించిన బచ్చల సుమేధ, శ్రీ హనీత్ రెడ్డి

పొదలకూరు,  మేజర్ న్యూస్ :    సర్వేపల్లి నియోజకవర్గంలో ప్రతి ఎంపీటీసీ, జడ్పీటీసీ స్థానంలో వైఎస్సార్‌సీపీ జెండా ఎగరేయడమే లక్ష్యంగా పార్టీ శ్రేణులు ఎన్నికల ప్రచారాన్ని ముమ్మరం చేశాయి. పొదలకూరు మండలం తాటిపర్తి గ్రామంలో వైఎస్సార్‌సీపీ అభ్యర్థులకు మద్దతుగా గడపగడపకూ ఎన్నికల ప్రచారం నిర్వహించారు. పొదలకూరు మండల వైఎస్సార్‌సీపీ జడ్పీటీసీ అభ్యర్థి బచ్చల సురేష్ కుమార్ రెడ్డి సతీమణి బచ్చల సుమేధ, బచ్చల శ్రీ హనీత్ రెడ్డి, తాటిపర్తి బిట్‌-1 ఎంపీటీసీ అభ్యర్థి ఉయ్యాల ప్రతాప్ రెడ్డి ఇంటింటికీ వెళ్లి ఓటర్లను కలిశారు.ఈ సందర్భంగా వారు మాట్లాడుతూ గత వైఎస్సార్‌సీపీ ప్రభుత్వ హయాంలో అమలు చేసిన సంక్షేమ పథకాలు, చేపట్టిన అభివృద్ధి కార్యక్రమాలను ప్రజలకు వివరించారు. మాజీ ముఖ్యమంత్రి వైఎస్ జగన్‌మోహన్‌రెడ్డి పాలనలో కులమతాలు, పార్టీలకు అతీతంగా అర్హులైన ప్రతి కుటుంబానికీ సంక్షేమ ఫలాలు అందాయని పేర్కొన్నారు. గ్రామాల్లో అభివృద్ధి, పేదల సంక్షేమానికి వైఎస్సార్‌సీపీ ప్రభుత్వం పెద్దపీట వేసిందన్నారు.

అభివృద్ధి, సంక్షేమమే వైఎస్సార్‌సీపీకి బలం

గత ప్రభుత్వంలో జరిగిన అభివృద్ధిని, ప్రజలకు అందిన సంక్షేమాన్ని గుర్తుచేసుకుని రానున్న స్థానిక సంస్థల ఎన్నికల్లో వైఎస్సార్‌సీపీ అభ్యర్థులను భారీ మెజార్టీతో గెలిపించాలని బచ్చల సుమేధ కోరారు. సర్వేపల్లి నియోజకవర్గంలో మాజీ మంత్రి కాకాణి గోవర్ధన్‌రెడ్డి నాయకత్వంలో వైఎస్సార్‌సీపీని మరింత బలోపేతం చేసేందుకు ప్రతి కార్యకర్త కృషి చేయాలన్నారు. ప్రజల ఆశీస్సులతో జడ్పీటీసీ, ఎంపీటీసీ స్థానాల్లో వైఎస్సార్‌సీపీ విజయం సాధిస్తుందన్న ధీమా వ్యక్తం చేశారు.తాటిపర్తి బిట్‌-1 ఎంపీటీసీ అభ్యర్థి ఉయ్యాల ప్రతాప్ రెడ్డిని, పొదలకూరు మండల జడ్పీటీసీ అభ్యర్థి బచ్చల సురేష్ కుమార్ రెడ్డిని భారీ మెజార్టీతో గెలిపించాలని ఓటర్లకు విజ్ఞప్తి చేశారు. గ్రామాభివృద్ధికి కట్టుబడి పనిచేస్తామని తెలిపారు. ఎన్నికల ప్రచారంలో వైఎస్సార్‌సీపీ నాయకులు, కార్యకర్తలు, అభిమానులు పాల్గొన్నారు.