సైబర్ నేరగాళ్లపై మెగా వేట.. 100 మందికి పైగా అరెస్ట్!
-మ్యూల్ ఖాతాల ముఠాపై సైబర్ సెక్యూరిటీ బ్యూరో ఉక్కుపాదం
-ఏపీ, తెలంగాణ సహా ఐదు రాష్ట్రాల్లో ఏకకాలంలో సోదాలు
-సైబర్ మోసాలకు బ్యాంకు ఖాతాలు, కేవైసీ పత్రాలు సరఫరా చేస్తున్న ఏజెంట్లు పట్టివేత
-హైదరాబాద్‌ డాక్టర్‌ నుంచి రూ.11 కోట్లు కాజేసిన కేసులో కీలక ఆధారాలు
-దుబాయ్‌ సహా విదేశాల్లోని సైబర్ నేరగాళ్లతో లింకులపై దర్యాప్తు
ఏపీ స్టేట్ బ్యూరో, అమరావతి :
సైబర్ నేరాలకు అడ్డుకట్ట వేసేందుకు సైబర్ సెక్యూరిటీ బ్యూరో భారీ ఆపరేషన్‌కు తెరలేపింది. సైబర్ మోసగాళ్లకు బ్యాంకు ఖాతాలు, కేవైసీ పత్రాలు సమకూర్చి వారి నేరాలకు సహకరిస్తున్న ముఠాలపై గత రెండు వారాలుగా కొనసాగుతున్న మెగా ఆపరేషన్‌లో 100 మందికి పైగా ఏజెంట్లను అరెస్ట్ చేసినట్లు అధికారులు తెలిపారు. ఆంధ్రప్రదేశ్‌, తెలంగాణతో పాటు కర్ణాటక, తమిళనాడు, కేరళ రాష్ట్రాల్లోని పలు ప్రాంతాల్లో ప్రత్యేక బృందాలు ఏకకాలంలో సోదాలు నిర్వహించాయి.
సైబర్ నేరగాళ్లు ఆన్‌లైన్‌ మోసాల ద్వారా కొల్లగొట్టిన నగదును నేరుగా తమ ఖాతాల్లోకి తీసుకోకుండా.. ఇతరుల పేర్లతో తెరిచిన బ్యాంకు ఖాతాల్లోకి మళ్లించి, అక్కడి నుంచి అనేక దశల్లో బదిలీ చేస్తుంటారు. ఈ వ్యవస్థలో కీలకంగా పనిచేసే ‘మ్యూల్ ఖాతాలు’ అందించే వ్యక్తులే తాజాగా సైబర్ బ్యూరో టార్గెట్‌గా మారారు. అరెస్టయిన నిందితులు నేరగాళ్లకు బ్యాంకు ఖాతాలతో పాటు డెబిట్‌ కార్డులు, పాస్‌బుక్‌లు, కేవైసీ పత్రాలను అందిస్తున్నట్లు దర్యాప్తులో గుర్తించినట్లు సమాచారం.
ఐదు రాష్ట్రాల్లో ఏకకాలంలో దాడులు
ఏపీ, తెలంగాణ, కర్ణాటక, తమిళనాడు, కేరళ రాష్ట్రాల్లోని అనుమానితుల కదలికలపై నిఘా పెట్టిన అధికారులు.. ప్రత్యేక బృందాలతో ఏకకాలంలో సోదాలు చేపట్టారు. ఈ తనిఖీల్లో మ్యూల్ ఖాతాలకు సంబంధించిన డెబిట్‌ కార్డులు, బ్యాంకు పాస్‌బుక్‌లు, ఇతర పత్రాలను స్వాధీనం చేసుకున్నట్లు తెలుస్తోంది.అరెస్టయిన వ్యక్తుల బ్యాంకు లావాదేవీలు, ఫోన్‌ కాల్స్‌, డిజిటల్ కమ్యూనికేషన్లు, సోషల్‌ మీడియా కార్యకలాపాలను అధికారులు పరిశీలిస్తున్నారు. దేశవ్యాప్తంగా నమోదైన పలు సైబర్ క్రైమ్‌ కేసులతో ఈ నెట్‌వర్క్‌కు సంబంధాలు ఉన్నాయా? అనే కోణంలోనూ దర్యాప్తు సాగుతోంది.
డాక్టర్‌ నుంచి రూ.11 కోట్లు కొట్టేసిన కేసులో కీలక మలుపు
హైదరాబాద్‌కు చెందిన ఓ వైద్యుడిని లక్ష్యంగా చేసుకుని సైబర్ నేరగాళ్లు రూ.11 కోట్ల మేర మోసం చేసిన కేసు దర్యాప్తులో ఈ మ్యూల్ ఖాతాల నెట్‌వర్క్‌ కీలకంగా బయటపడినట్లు అధికారులు గుర్తించారు. బాధితుడి నుంచి దోచుకున్న మొత్తాన్ని పలు మ్యూల్ బ్యాంకు ఖాతాల్లోకి మళ్లించినట్లు దర్యాప్తులో తేలినట్లు సమాచారం.డబ్బు ఒక ఖాతా నుంచి మరో ఖాతాకు బదిలీ చేస్తూ.. చివరకు అసలు సూత్రధారుల ఆచూకీ కనిపించకుండా చేసేందుకు ఈ నెట్‌వర్క్‌ను ఉపయోగించినట్లు అధికారులు అనుమానిస్తున్నారు. దీంతో తాజాగా అరెస్టయిన వ్యక్తుల నుంచి మరిన్ని వివరాలు రాబట్టేందుకు విచారణ కొనసాగిస్తున్నారు.
మ్యూల్ ఖాతాలే సైబర్ మోసాలకు ఆయుధం
ఫిషింగ్‌, నకిలీ పెట్టుబడి పథకాలు, డిజిటల్ అరెస్టులు, ఉద్యోగాల పేరుతో మోసాలు, ఇతర ఆన్‌లైన్‌ నేరాల ద్వారా సైబర్ ముఠాలు భారీగా డబ్బు కొల్లగొడుతున్నాయి. ఈ నగదును సురక్షితంగా తరలించేందుకు మ్యూల్ ఖాతాలను ఉపయోగిస్తున్నట్లు అధికారులు గుర్తించారు.తక్కువ మొత్తానికి లేదా కమీషన్‌ కోసం కొందరు వ్యక్తులు తమ పేర్లతో బ్యాంకు ఖాతాలు తెరిచి సైబర్ నేరగాళ్లకు అందిస్తున్నట్లు దర్యాప్తులో వెల్లడైనట్లు తెలుస్తోంది. ఖాతాతో పాటు డెబిట్‌ కార్డు, పాస్‌బుక్‌, కేవైసీ వివరాలు కూడా అప్పగించడం ద్వారా నేరగాళ్లకు డబ్బు తరలింపులో సహకరిస్తున్నారని అధికారులు గుర్తించారు.
దుబాయ్‌ నుంచి ఆపరేషనా?
ఈ నెట్‌వర్క్‌ వెనుక దేశీయ సైబర్ నేరగాళ్లతో పాటు దుబాయ్‌, ఇతర దేశాల్లో ఉన్న నేరగాళ్ల ప్రమేయం ఉందా? అనే కోణంలో అధికారులు దర్యాప్తు చేస్తున్నారు. మ్యూల్ ఖాతాల ద్వారా బదిలీ అయిన నగదు చివరకు ఎక్కడికి చేరింది? విదేశాల్లో ఉన్న సూత్రధారులకు ఈ నెట్‌వర్క్‌ ఎలా అనుసంధానమైంది? అన్న అంశాలపై ఆరా తీస్తున్నారు.అరెస్టయిన నిందితుల ఫోన్లు, బ్యాంకు ఖాతాలు, డిజిటల్ ఆధారాలను విశ్లేషించడం ద్వారా ఈ నెట్‌వర్క్‌ అసలు సూత్రధారులను గుర్తించేందుకు అధికారులు ప్రయత్నిస్తున్నారు. దేశవ్యాప్తంగా నమోదైన ఇతర సైబర్ మోసాల కేసులతోనూ తాజా అరెస్టులకు సంబంధం ఉందా? అనే విషయాన్ని పరిశీలిస్తున్నారు.
ట్రాన్సిట్‌ వారెంట్లపై హైదరాబాద్‌కు తరలింపు
వివిధ రాష్ట్రాల్లో అరెస్టయిన అనుమానితులను ట్రాన్సిట్‌ వారెంట్లపై హైదరాబాద్‌కు తరలిస్తున్నట్లు అధికారులు తెలిపారు. అక్కడ వారిని విచారించి మ్యూల్ ఖాతాల వెనుక ఉన్న ప్రధాన సూత్రధారులు, డబ్బు బదిలీ మార్గాలు, విదేశీ లింకులపై మరింత సమాచారం సేకరించనున్నారు.100 మందికి పైగా ఏజెంట్ల అరెస్ట్‌తో సైబర్ మోసాల వెనుక పనిచేస్తున్న భారీ ఆర్థిక నెట్‌వర్క్‌పై దర్యాప్తు సంస్థలకు కీలక ఆధారాలు లభించినట్లు తెలుస్తోంది. మ్యూల్ ఖాతాల నుంచి అసలు సైబర్ మాఫియా సూత్రధారుల వరకు దర్యాప్తు సాగుతుండటంతో మరిన్ని అరెస్టులు జరిగే అవకాశం ఉంది.
