సామూహిక వేదపారాయణంతో మార్మోగిన సాయి సమితి ప్రాంగణం.
శతజయంతి ముగింపు ఉత్సవాల్లో భాగంగా పలాసలో వేదపారాయణం.
వేదపోషణ అందరి బాధ్యత - కన్వీనర్ తిరుమలరావు.
పలాస, మేజర్ న్యూస్ : శ్రీ సత్యసాయి శతజయంతి వేడుకల ముగింపు ఉత్సవాల్లో భాగంగా ఆదివారం శ్రీ సత్యసాయి సేవాసమితి పలాస వారి ఆధ్వర్యంలో సమితి ప్రాంగణంలో సామూహిక వేదపారాయణ కార్యక్రమాన్ని భక్తిశ్రద్ధలతో నిర్వహించారు.ఉదయం నుంచే సమితి ప్రాంగణం వేద మంత్రోచ్చారణలతో మార్మోగింది. వేదం గురువుగారి ఆధ్వర్యంలో భక్తులు సామూహికంగా వేదపారాయణం చేశారు.ఈ సందర్భంగా కన్వీనర్ ఇప్పిలి తిరుమలరావు మాట్లాడుతూ భగవాన్ శ్రీ సత్యసాయి బాబావారు అనేక సందర్భాల్లో వేదపోషణ అందరి బాధ్యత అని చెప్పినట్లు గుర్తు చేశారు.వేదాలు కేవలం పుస్తకాలకే పరిమితం కాకూడదని,అవి ప్రతి ఇంట్లో, ప్రతి నోట పలకాలని బాబా ఆకాంక్షించారని అన్నారు. వేద మంత్రాల ఉచ్చారణ ద్వారా మనసుకు ప్రశాంతత, సమాజానికి శ్రేయస్సు కలుగుతుందని తెలిపారు.వేదాలను కాపాడుకోవడం, వాటిని తరువాతి తరాలకు అందించడం ప్రతి ఒక్కరి కర్తవ్యమని ఆయన పిలుపునిచ్చారు. శతజయంతి సందర్భంగా వేదపారాయణం నిర్వహించడం ఎంతో సంతోషంగా ఉందన్నారు.ఈ కార్యక్రమంలో వేదం గురువుగారు, మద్ది కామేశ్వరరావు, తాళాసు సూర్యప్రకాశ్, శ్రీ సత్యసాయి ఎడ్యుకేషనల్ ట్రస్ట్ చైర్మన్ మల్లా రామేశ్వరరావు, తర్లాన రమేష్ తో పాటు అధిక సంఖ్యలో మహిళలు పాల్గొన్నారు.మహిళలు పెద్ద సంఖ్యలో పాల్గొని వేద మంత్రాలను పారాయణం చేయడం ప్రత్యేక ఆకర్షణగా నిలిచింది. చివరిలో భక్తులకు తీర్థప్రసాదాలు పంపిణీ చేశారు.ఈ కార్యక్రమంలో సమితి కన్వీనర్ ఇప్పిలి తిరుమలరావు, వేదం గురువుగారు, మద్ది కామేశ్వరరావు, తాళాసు సూర్యప్రకాశ్, మల్లా రామేశ్వరరావు, తర్లాన రమేష్ తదితరులు పాల్గొన్నారు.