సాగునీటి ప్రాజెక్టుపై సమీక్ష

నేటి దినపత్రిక సూర్య బ్యూరో రాజమహేంద్రవరంరాష్ట్ర ముఖ్యమంత్రి నారా చంద్రబాబు నాయుడు అధ్యక్షతన బుధవారం ఉండవల్లిలోని ముఖ్యమంత్రి క్యాంపు కార్యాలయంలో రాష్ట్రంలోని సాగునీటి ప్రాజెక్టులు, ఎత్తిపోతల పథకాలపై సమీక్ష సమావేశం నిర్వహించారు. ఈ సమావేశంలో జలవనరుల శాఖ మంత్రి నిమ్మల రామానాయుడుతో కలిసి రాష్ట్ర నీటిపారుదల అభివృద్ధి సంస్థ చైర్మన్ వేగుళ్ల లీలాకృష్ణ పాల్గొన్నారు.

ఈ సందర్భంగా రాష్ట్రంలోని ఎత్తిపోతల పథకాల మరమ్మతులు, నిర్వహణ, ఇరిగేషన్ భూముల్లో సౌర విద్యుత్ ప్లాంట్ల ఏర్పాటుపై ముఖ్యమంత్రి సమగ్రంగా సమీక్షించారు. రాష్ట్ర ప్రభుత్వం ప్రతిష్టాత్మకంగా చేపట్టిన 36 సాగునీటి ప్రాజెక్టులను ,ఆ రెండున్నరేళ్లలో పూర్తి చేయాలని అధికారులను ఆదేశించారు. నిర్మాణ పనుల్లో వేగం పెంచి, నిర్ణీత గడువులోగా లక్ష్యాలను సాధించేలా పక్కా కార్యాచరణ రూపొందించాలని సూచించారు.

వివిధ శాఖల అధికారులు సమన్వయంతో పనిచేస్తూ ప్రాజెక్టులను సకాలంలో పూర్తి చేయాలని ముఖ్యమంత్రి దిశానిర్దేశం చేశారు. రాష్ట్రంలో సాగునీటి రంగాన్ని బలోపేతం చేసి రైతులకు పూర్తిస్థాయిలో సాగునీటి సదుపాయాలు కల్పించడంపై ప్రభుత్వం ప్రత్యేక దృష్టి సారించిందని పేర్కొన్నారు.ఈ సమావేశంలో వివిధ సాగునీటి ప్రాజెక్టుల డైరెక్టర్లు, జలవనరుల శాఖకు చెందిన ఉన్నతాధికారులు పాల్గొన్నారు.