సిమ్స్ ఆసుపత్రి యాజమాన్యానికి జిజిహెచ్ సూపరింటెండెంట్ ఘన సన్మానం

అనంతపురం బ్యూరో మేజర్ న్యూస్ : ప్రభుత్వ సర్వజన ఆసుపత్రి (GGH) అభివృద్ధికి తమ వంతు సామాజిక బాధ్యతగా ముందుకు వచ్చి ఆర్థిక సాయం అందించిన సిమ్స్ ఆసుపత్రి యాజమాన్యాన్ని జీజీహెచ్ సూపరింటెండెంట్ డాక్టర్ మల్లీశ్వరి ఘనంగా సన్మానించారు.

​సుమారు రూ. 3 లక్షల వ్యయంతో ఆసుపత్రికి అవసరమైన ఫర్నిచర్‌ను విరాళంగా అందజేసిన సిమ్స్ ఆసుపత్రి మేనేజ్‌మెంట్ ప్రతినిధులు జి. రామకృష్ణారెడ్డి, డాక్టర్ జి. స్వరూప రెడ్డి, డాక్టర్ ఎం. అశ్వర్థరెడ్డిలను సూపరింటెండెంట్ డాక్టర్ మల్లీశ్వరి శాలువాతో సత్కరించి, జ్ఞాపికను అందజేశారు.

​ఈ సందర్భంగా డాక్టర్ మల్లీశ్వరి మాట్లాడుతూ.. ప్రభుత్వ ఆసుపత్రికి వచ్చే పేద రోగతులకు మెరుగైన వసతులు కల్పించేందుకు సిమ్స్ ఆసుపత్రి యాజమాన్యం రూ. 3 లక్షల విలువైన ఫర్నిచర్ అందించడం ఎంతో అభినందనీయమని కొనియాడారు. వారి ఉదారతకు జీజీహెచ్ యాజమాన్యం తరఫున ప్రత్యేక కృతజ్ఞతలు తెలిపారు. సమాజంలో ఉన్నత స్థానంలో ఉన్నవారు, కార్పొరేట్ సంస్థలు ఇలాగే ముందుకు వచ్చి ప్రభుత్వ ఆసుపత్రుల అభివృద్ధికి సహకరించాలని ఆమె కోరారు. ఈ కార్యక్రమంలో ఆసుపత్రి వైద్యులు, సిబ్బంది పాల్గొన్నారు.