రక్తదానం ప్రాణదానం తో సమానం - ఆత్మకూరులో పోలీసుల ఆధ్వర్యంలో మెగా రక్తదానశిభిరం

ఆత్మకూరు, మేజర్ న్యూస్ :   రక్తదానం ప్రాణదానం తో సమానం అని ఆత్మకూరు డి ఎస్ పి టి. వెంకటేశ్వర్లు  పేర్కొన్నారు. పోలీస్ అమరవీరుల సంస్మరణ దినోత్సవం పురస్కరించుకొని వారోత్సవాల్లో భాగంగా బుధవారం ఆత్మకూరులోని ప్రభుత్వ జిల్లా వైద్యశాలలో పోలీసుల ఆధ్వర్యంలో మెగా రక్తదాన శిబిరం నిర్వహించారు. పోలీస్ అధికారులు, పోలీసు సిబ్బందితో పాటు పలువురు 75 యూనిట్ల రక్తాన్ని  దానం చేశారుm ఈ సందర్భంగా డిఎస్పి వెంకటేశ్వర్లు మాట్లాడుతూ పోలీస్ అమరవీరుల సంస్కరణార్థం వారం రోజులపాటు వివిధ సామాజిక సేవా కార్యక్రమాలను నిర్వహిస్తూ అమర పోలీసులను స్మరించుకుంటున్నామని పేర్కొన్నారు. రక్తదానం సమాజానికి ఎంతో ఆవశ్యకమని, రక్తానికి ప్రత్యామ్నాయం లేదని, ఆపదలో ఉన్న వారికి రక్తం ప్రాణదానం చేస్తుందని పేర్కొన్నారు. స్థానిక సి ఐ జి.గంగాధర్ మాట్లాడుతూ వారం రోజులు పాటు వివిధ రకాల సామాజిక సేవా కార్యక్రమాలు, అవగాహన కార్యక్రమాలతో విధుల నిర్వహణలో అసువులు బాసిన అమర పోలీసుల ను స్మరించుకుంటున్నామని పేర్కొన్నారు. వారి జ్ఞాపకార్థం సమాజానికి ఎంతో ఉపయోగకరమైన రక్తదాన శిబిరాన్ని నిర్వహించామని సిఐ గంగాధర్ పేర్కొన్నారు. ఈ కార్యక్రమంలో ఎస్సైలు జంపాని కుమార్,కాసా శ్రీనివాసులు రెడ్డి,రాజేష్, పలువురు పోలీస్ సిబ్బంది, హాస్పిటల్ సిబ్బంది తదితరులు పాల్గొన్నారు.