రైతుల సమస్యల పరిష్కారమే లక్ష్యం.. కూటమిని ఆశీర్వదించండి: ఎమ్మెల్యే కావ్య

కావలి,  మేజర్ న్యూస్ :    దగదర్తి మండలం వెలుపోడు సెగ్మెంట్ పరిధిలోని ధర్మవరం గ్రామంలో నిర్వహించిన ఎన్నికల ప్రచారంలో కావలి ఎమ్మెల్యే కావ్య కృష్ణారెడ్డి పాల్గొన్నారు. కూటమి బలపరిచిన అభ్యర్థులను భారీ మెజార్టీతో గెలిపించాలని ఆయన ప్రజలను కోరారు.  దివంగత మాలేపాటి సుబ్బానాయుడు సతీమణి మాలేపాటి భావనమ్మను దగదర్తి ఎంపీపీగా, జెడ్పీటీసీ అభ్యర్థి మాందా శీనయ్యను, ఎంపీటీసీ అభ్యర్థి మద్దెల పద్మను సైకిల్ గుర్తుపై ఓటు వేసి గెలిపించాలని విజ్ఞప్తి చేశారు.ఈ సందర్భంగా ఎమ్మెల్యే మాట్లాడుతూ... ధర్మవరం గ్రామంలో రైతులు ఎదుర్కొంటున్న సమస్యలను త్వరలోనే పరిష్కరిస్తామని హామీ ఇచ్చారు. డీఎఫ్, డీఆర్ ఛానల్ పనులను వేగవంతం చేసి సాగునీటి సమస్య లేకుండా చూస్తామన్నారు. ఏళ్ల తరబడి నలుగుతున్న భూ సమస్యలకు శాశ్వత పరిష్కారం చూపుతామని స్పష్టంచేశారు.ముఖ్యమంత్రి చంద్రబాబు నాయుడు నేతృత్వంలో నియోజకవర్గ సమగ్రాభివృద్ధికి కృషి చేస్తున్నామని, అర్హులైన ప్రతి ఒక్కరికీ త్వరలోనే కొత్త పింఛన్లు, ఇళ్ల స్థలాల కేటాయింపు పూర్తి చేస్తామని తెలిపారు.
ఈ కార్యక్రమంలో కూటమి నాయకులు, కార్యకర్తలు, మహిళలు, గ్రామస్తులు పెద్ద సంఖ్యలో పాల్గొన్నారు.