రైతు పక్షపాతి కూటమి ప్రభుత్వం

 రాజముద్రతో రైతులకు పట్టాదారు పాస్ పుస్తకాలు ....  అధికారంలోకి రాగానే ల్యాండ్ యాక్ట్ రద్దు చేశాం .... రైతులకు గిట్టుబాటు ధర కల్పించాం  ..... కోవూరు ఎమ్మెల్యే వేమిరెడ్డి ప్రశాంతి రెడ్డి
బుచ్చిరెడ్డిపాలెం,మేజర్ న్యూస్  :  రాష్ట్ర ముఖ్యమంత్రి చంద్రబాబునాయుడు ఆధ్వర్యంలోని కూటమి ప్రభుత్వం రైతుల పక్షపాతి అని కోవూరు ఎమ్మెల్యే వేమిరెడ్డి ప్రశాంతి రెడ్డి పేర్కొన్నారు. శుక్రవారం పట్టణంలోని ప్రాథమిక ఆరోగ్య కేంద్రం ఆవరణలో జరిగిన రైతుల పట్టాదారు పాసుపుస్తకాల పంపిణీ కార్యక్రమంలో ఆమె పాల్గొన్నారు. ఈ సందర్భంగా ఎమ్మెల్యే మాట్లాడుతూ తమ ప్రభుత్వం అధికారంలోకి రాకముందు ముఖ్యమంత్రి చంద్రబాబు నాయుడు  ల్యాండ్ యాక్ట్ రద్దు చేయాలని గొప్ప నిర్ణయం తీసుకున్నారని అలాగే తాము అధికారంలోకి రాగానే రద్దు చేయడం జరిగిందన్నారు. రైతులు ఎప్పటికీ ఇబ్బంది పడకుండా రీ సర్వే జరిపించి రాజముద్రతో పట్టాదారు పాసుపుస్తకాలు అందిస్తున్న ఘనత ముఖ్యమంత్రి చంద్రబాబునాయుడు దే నన్నారు. దీనికి డెల్టా ప్రాంతమైన కోవూరు నియోజకవర్గ రైతులందరి తరపున ముఖ్యమంత్రి కి ధన్యవాదాలు తెలియజేస్తున్నానన్నారు. ప్రతి మండలంలో రీ సర్వే జరిపి రైతులకు పట్టాదారు పాసుపుస్తకాలు అందివ్వడం జరిగిందన్నారు. రైతులకు ఈ సంవత్సరం పంట కోసినదగ్గర నుండి తమ ధాన్యం అమ్మే వరకు మంచి జరిగినట్లు ఎమ్మెల్యే తెలిపారు. తాము పండించిన పంటకు తగినంత గిట్టుబాటు ధర ఉండటంతో రైతులు సంతోషంగా ఉన్నారన్నారు. ఎల్ ని నో సమస్య వల్ల ఎండలు అధికంగా ఉన్నాయని ముఖ్యమంత్రి చంద్రబాబు నాయుడు రాష్ట్రం మొత్తం వరుణ యాగాలు చేయించడం జరిగిందని, త్వరలో వర్షాలు కురిసి రాష్ట్రం సుభిక్షంగా ఉంటుందని ఎమ్మెల్యే జ్యోస్యం చెప్పారు. రైతులు బాగుంటేనే రాష్ట్రం బాగుంటుందన్నారు. రైతులు తమ ధాన్యాన్ని అమ్ముకునేందుకు, తరలించేందుకు వీలుగా నియోజకవర్గంలో అవసరమైన ప్రతి చోట జడ్జిలు నిర్మించడం జరిగిందన్నారు. తమ ప్రాంతంలో ఇంకా ఏమైనా సమస్యలు ఉంటే రైతు సోదరులు తన దృష్టికి తీసుకువస్తే వాటిని కూడా పూర్తి చేసేందుకు తాను సిద్ధంగా ఉన్నానన్నారు. అందుబాటులో ఉన్న నీటిని బట్టి రైతులు పంటలు వేసుకోవాలని కోరారు. ఈ కార్యక్రమంలో టిడిపి పట్టణ అధ్యక్షులు గుత్తా శ్రీనివాసులు, మున్సిపల్ చైర్ పర్సన్ మోర్ల సుప్రజా మురళి, టిడిపి నాయకులు మోర్ల మురళి, ఏటూరి శివరామకృష్ణారెడ్డి, నీటి సంఘం అధ్యక్షులు బత్తల హరికృష్ణ, క్లస్టర్ ఇంచార్జ్ వింజం రామానాయుడు, మండల టిడిపి నాయకులు, కార్యకర్తలు, రైతులు భారీగా పాల్గొన్నారు.