ప్రతికూల పరిస్థితుల్లోనూ వైసీపీకి 25 ఎంపీటీసీ స్థానాలు

పొదలకూరు,  మేజర్ న్యూస్ :    సర్వేపల్లి నియోజకవర్గంలో ఎన్నో ప్రతికూల పరిస్థితులు, అధికార పార్టీ ఒత్తిళ్లు, బెదిరింపులను ఎదుర్కొని వైఎస్సార్ కాంగ్రెస్ పార్టీ స్థానిక సంస్థల ఎన్నికల్లో మంచి ఫలితాలు సాధించిందని మాజీ మంత్రి, వైసీపీ జిల్లా అధ్యక్షుడు డాక్టర్ కాకాణి గోవర్ధన్‌రెడ్డి అన్నారు. శుక్రవారం పొదలకూరులోని వైసీపీ కార్యాలయంలో నిర్వహించిన సమావేశంలో ఆయన మాట్లాడారు.సర్వేపల్లి నియోజకవర్గంలో వైసీపీ 25 ఎంపీటీసీ స్థానాలను కైవసం చేసుకుందని తెలిపారు. మరో ఐదు ఎంపీటీసీ, రెండు జెడ్పీటీసీ స్థానాలను, ఒక మండల పరిషత్‌ స్థానాన్ని అక్రమాలు, కుట్రల కారణంగా కోల్పోయామని ఆరోపించారు. ముత్తుకూరు జెడ్పీటీసీ అభ్యర్థి పరిమళమ్మ విజయం సాధించినప్పటికీ 57 ఓట్ల తేడాతో ఓడిపోయినట్లు ప్రకటించారని విమర్శించారు. పొదలకూరు జెడ్పీటీసీ అభ్యర్థి బచ్చల సురేష్‌కుమార్‌రెడ్డిని సైతం కౌంటింగ్‌లో జరిగిన పరిణామాలతో 46 ఓట్ల తేడాతో ఓడించారని పేర్కొన్నారు.గతంలో రెండు ఎంపీటీసీ స్థానాలకే పరిమితమైన టీడీపీ.. ప్రస్తుతం అధికారంలో ఉండి యంత్రాంగాన్ని ఉపయోగించుకున్నప్పటికీ వైసీపీ 25 స్థానాలు గెలుచుకోవడం ప్రజా మద్దతుకు నిదర్శనమన్నారు. కూటమి ప్రభుత్వంపై ప్రజల్లో ఉన్న వ్యతిరేకత ఎన్నికల ఫలితాల్లో ప్రతిబింబించిందని పేర్కొన్నారు. సర్వేపల్లిలో సోమిరెడ్డి రాజకీయ పతనానికి ఈ ఫలితాలు తొలి అడుగని వ్యాఖ్యానించారు.రాబోయే గ్రామ పంచాయతీ ఎన్నికల్లోనూ వైఎస్సార్ కాంగ్రెస్ పార్టీ విజయం సాధిస్తుందని కాకాణి ధీమా వ్యక్తం చేశారు. పార్టీ అభ్యర్థుల విజయానికి కృషి చేసిన నాయకులు, కార్యకర్తలకు అభినందనలు తెలిపి, తమకు అండగా నిలిచిన నియోజకవర్గ ప్రజలకు కృతజ్ఞతలు తెలియజేశారు. ఈ కార్యక్రమంలో వైసీపీ నాయకులు, కార్యకర్తలు, అభిమానులు పాల్గొన్నారు.