బాల్య వివాహాల నిర్మూలనకు సమష్టి కృషి చేయాలి - మంచిర్యాల ఆర్డీవో శ్రీనివాసరావు

సూర్య మంచిర్యాల :బాల్య వివాహాల నిర్మూలనకు అన్ని శాఖల అధికారులు సమన్వయంతో పనిచేస్తూ ప్రజల్లో విస్తృత అవగాహన కల్పించాలని మంచిర్యాల రాజస్వ మండల అధికారి (ఆర్డీవో) శ్రీనివాసరావు సూచించారు.శుక్రవారం జిల్లా కేంద్రంలోని సమీకృత జిల్లా కార్యాలయాల భవనంలో జిల్లా మహిళా,శిశు సంక్షేమ శాఖ అధికారి రౌఫ్ ఖాన్‌తో కలిసి వివిధ శాఖల అధికారులతో సమన్వయ సమావేశం నిర్వహించారు.ఈ సందర్భంగా ఆర్డీవో మాట్లాడుతూ బాల్య వివాహాల వల్ల బాలికలు అనారోగ్య సమస్యలతో పాటు మానసిక ఇబ్బందులు ఎదుర్కొనే ప్రమాదం ఉందన్నారు.బాలికల భవిష్యత్తును దృష్టిలో ఉంచుకుని తల్లిదండ్రులు వారికి విద్యకు ప్రాధాన్యతనిస్తూ ఉన్నత చదువులు చదివేలా ప్రోత్సహించాలని సూచించారు.బాల్య వివాహాల సమాచారం అందిన వెంటనే సంబంధిత కుటుంబాలకు కౌన్సెలింగ్ నిర్వహించి,బాల్య వివాహ నిరోధక చట్టం ప్రకారం కలిగే శిక్షలపై అవగాహన కల్పించాలని అధికారులను ఆదేశించారు.బాల్య వివాహాలు జరగబోతున్నట్లు తెలిసినా,ఇప్పటికే జరిగినా వెంటనే సంబంధిత అధికారులకు సమాచారం అందించాలని,సమాచారం ఇచ్చిన వారి వివరాలను గోప్యంగా ఉంచుతామని తెలిపారు.బాల్య వివాహ ముక్త్ భారత్ కార్యక్రమంలో భాగంగా నవంబర్ 5 నుంచి 16 వరకు పాఠశాలల్లో,17 నుంచి 26 వరకు ప్రార్థనా మందిరాలు,ఫంక్షన్ హాళ్లలో అవగాహన కార్యక్రమాలు నిర్వహించనున్నట్లు వెల్లడించారు.నవంబర్ 27న అన్ని గ్రామ పంచాయతీల్లో గ్రామసభలు నిర్వహించి ప్రజలకు అవగాహన కల్పించడంతో పాటు,నవంబర్ 28 నుంచి డిసెంబర్ 21 వరకు ప్రత్యేక ప్రచార కార్యక్రమాలు చేపట్టనున్నట్లు తెలిపారు.జిల్లా సంక్షేమ అధికారి రౌఫ్ ఖాన్ మాట్లాడుతూ బాల్య వివాహాలకు సంబంధించి చైల్డ్ హెల్ప్‌లైన్ 1098 ద్వారా ఫిర్యాదులు అందుతున్నాయని,వాటిపై అధికారులు తక్షణమే స్పందించి చర్యలు తీసుకుంటున్నారని తెలిపారు.గ్రామ పంచాయతీ స్థాయిలో విస్తృత ప్రచారం నిర్వహించాలని,జనాభా ఎక్కువగా ఉన్న ప్రాంతాలను గుర్తించి ప్రత్యేక అవగాహన కార్యక్రమాలు చేపట్టాలని సూచించారు.ఈ సమావేశంలో జిల్లా మాస్ మీడియా అధికారి బుక్క వెంకటేశ్వర్లు,రెవెన్యూ, మహిళా,శిశు సంక్షేమ, పోలీస్ శాఖల అధికారులు తదితరులు పాల్గొన్నారు.