*చింతలగట్టులో చలి సెగలు.. చలి మంటల చుట్టూ జనం!*

కోహిర్;కోహిర్ మండలంలోని చింతలగట్టు గ్రామంలో చలి తీవ్రత పెరుగుతుండటంతో ప్రజలు ఇబ్బందులు ఎదుర్కొంటున్నారు. ముఖ్యంగా రాత్రి వేళల్లో చల్లటి గాలులు వీస్తుండటంతో చలిని తట్టుకోవడానికి గ్రామస్తులు చలి మంటలు వేసుకుంటున్నారు.శుక్రవారం రాత్రి గ్రామంలో పలువురు కుటుంబ సభ్యులు, చిన్నారులు కలిసి మంటల చుట్టూ కూర్చొని చలి నుంచి ఉపశమనం పొందుతున్న దృశ్యం కనిపించింది. చిన్నారులు సైతం చలి తీవ్రతకు ఇబ్బంది పడుతూ పెద్దలతో కలిసి మంటల వద్ద వెచ్చదనం పొందుతున్నారు.పగటి వేళలతో పోలిస్తే రాత్రి, తెల్లవారుజామున చలి తీవ్రత ఎక్కువగా ఉండటంతో వృద్ధులు, చిన్నపిల్లలు ప్రత్యేక జాగ్రత్తలు తీసుకోవాల్సిన అవసరం ఉంది. చలి నుంచి రక్షణ పొందేందుకు వెచ్చని దుస్తులు ధరించాలని, అనవసరంగా రాత్రి వేళల్లో బయట తిరగవద్దని గ్రామస్తులు సూచిస్తున్నారు.చలి తీవ్రత పెరుగుతున్న నేపథ్యంలో రాబోయే రోజుల్లో ప్రజలు అప్రమత్తంగా ఉండాలని కోరుతున్నారు.