ప్రశాంత వాతావరణంలో దసరా పండుగ నిర్వహణకు పోలీసుల సన్నద్ధత..సిబ్బందికి పలు కీలక సూచనలు చేసిన వన్‌టౌన్‌ సీఐ టి.వి. కొండారెడ్డి
ప్రొద్దుటూరు అర్బన్ మేజర్ న్యూస్:
రానున్న దసరా పండుగ వేడుకలు ప్రశాంతంగా, సజావుగా జరిగేలా ప్రొద్దుటూరు వన్‌టౌన్‌ పోలీసులు ప్రత్యేక చర్యలు చేపట్టారు. జిల్లా ఎస్పీ షెల్కే నచికేత్ విశ్వనాథ్, ఐపీఎస్‌ ఆదేశాల మేరకు వన్‌టౌన్‌ పోలీస్‌ స్టేషన్‌లో పోలీసు సిబ్బందితో ప్రత్యేక సమావేశం నిర్వహించారు. వన్‌టౌన్‌ సీఐ టి.వి. కొండారెడ్డి ఆధ్వర్యంలో జరిగిన ఈ సమావేశంలో దసరా వేడుకల సందర్భంగా తీసుకోవాల్సిన భద్రతా చర్యలపై సిబ్బందికి దిశానిర్దేశం చేశారు.
దసరా పండుగ సందర్భంగా పట్టణంలోని ఆలయాలు, ప్రధాన కూడళ్లు, మార్కెట్‌ ప్రాంతాలు, ప్రజలు అధికంగా గుమిగూడే ప్రదేశాల్లో ప్రత్యేక నిఘా ఏర్పాటు చేయాలని సూచించారు. పండుగ రోజుల్లో ప్రజల రాకపోకలు పెరిగే అవకాశం ఉన్నందున ట్రాఫిక్‌ నియంత్రణపై ప్రత్యేక దృష్టి సారించాలని సిబ్బందికి ఆదేశించారు. అదేవిధంగా బందోబస్తు విధుల్లో ఉన్న సిబ్బంది నిరంతరం అప్రమత్తంగా ఉండాలని, అనుమానాస్పద వ్యక్తులు, వస్తువులపై నిఘా ఉంచాలని సూచించారు. శాంతిభద్రతలకు విఘాతం కలిగించే ఎలాంటి పరిస్థితులు తలెత్తకుండా ముందస్తు చర్యలు చేపట్టాలని తెలిపారు. ప్రజలకు ఎటువంటి అసౌకర్యం కలగకుండా ట్రాఫిక్‌ నియంత్రణ, భద్రతా చర్యలను సమన్వయంతో చేపట్టాలని సీఐ కొండారెడ్డి సూచించారు. పండుగ వేడుకల సమయంలో ఏవైనా అవాంఛనీయ ఘటనలు చోటుచేసుకోకుండా ప్రతి ఒక్కరూ బాధ్యతాయుతంగా విధులు నిర్వర్తించాలని స్పష్టం చేశారు.
దసరా వేడుకలను ప్రజలు ప్రశాంతంగా, ఆనందంగా జరుపుకునేలా పోలీసు శాఖ తరఫున అవసరమైన అన్ని భద్రతా చర్యలు చేపడుతున్నట్లు అధికారులు తెలిపారు.
-ఎ ప్రతాప్ కుమార్ ప్రొద్దుటూరు అర్బన్ కడప జిల్లా
