ప్రజా ఆశీర్వాదంతో అభివృద్ధికి బాటలు వేస్తా!

భోగాపురం, సూర్య : తండ్రి కర్రోతు బంగార్రాజు అందించిన రాజకీయ అనుభవం, ప్రజలతో ఉన్న అనుబంధాన్ని వారసత్వంగా తీసుకుని భోగాపురం మండల అభివృద్ధికి తనవంతు కృషి చేస్తానని జడ్పీటీసీ అభ్యర్థిని కర్రోతు చంద్రకళ పేర్కొన్నారు. తనను ఆశీర్వదించి జడ్పీటీసీగా అవకాశం కల్పించాలని ప్రజలను అభ్యర్థించారు. ప్రజల నమ్మకాన్ని నిలబెట్టుకుంటూ, అభివృద్ధి, సంక్షేమ కార్యక్రమాల అమలుకు కృషి చేస్తానని ఆమె హామీ ఇచ్చారు. మండలంలోని తూడెం, కౌలువాడ గ్రామాల్లో ఎంపీటీసీ అభ్యర్థిని కుంచం శాంతకుమారితో కలిసి చంద్రకళ ఇంటింటి ప్రచారం నిర్వహించారు. ఈ కార్యక్రమంలో ఏపీ మార్క్‌ఫెడ్‌ చైర్మన్, తెదేపా మండల ఇన్‌చార్జి కర్రోతు బంగార్రాజు కూడా పాల్గొన్నారు. గ్రామాల్లో ప్రజలను, పార్టీ శ్రేణులను కలుసుకుంటూ కూటమి అభ్యర్థులకు మద్దతుగా ప్రచారం సాగించారు. ప్రజల సమస్యలు, గ్రామాల అభివృద్ధికి సంబంధించిన అంశాలను ప్రస్తావిస్తూ ఓటర్లతో మమేకమయ్యారు. కూటమి ప్రభుత్వం చేపడుతున్న అభివృద్ధి, సంక్షేమ కార్యక్రమాలను ప్రజలకు వివరిస్తూ రానున్న ఎన్నికల్లో కూటమి అభ్యర్థులకు మద్దతు తెలిపి విజయాన్ని అందించాలని నాయకులు కోరారు. ప్రజల ఆకాంక్షలకు అనుగుణంగా గ్రామాల అభివృద్ధికి ప్రాధాన్యమిస్తూ ముందుకు సాగుతామని పేర్కొన్నారు. తండ్రి రాజకీయ అనుభవం, ప్రజలతో ఉన్న సంబంధాలు తనకు మార్గదర్శకంగా నిలుస్తాయని చంద్రకళ ఆశాభావం వ్యక్తం చేశారు. ఈ కార్యక్రమంలో మాజీ ఏఎంసీ చైర్మన్ దంతులూరి సూర్యనారాయణ రాజు, తెదేపా పార్లమెంట్ అధికార ప్రతినిధి నీలాపు అప్పలరామిరెడ్డి, క్లస్టర్‌ కో-కన్వీనర్‌ కోరాడ తాతారావు, మండల రైతు అధ్యక్షుడు రీసు రమణ, మాజీ సర్పంచి సూరి అప్పారావు, ఏఎంసీ డైరెక్టర్‌ గరి వెంకటరమణ, మాజీ ఎంపీటీసీ వెంకటసత్యం, బాలు, స్థానిక తెదేపా నాయకులు, కార్యకర్తలు, కూటమి శ్రేణులు పాల్గొన్నారు.

రిపోర్టర్ : వై శ్రీనివాస రావు, భోగాపురం, విజయనగరం జిల్లా.