మాచవరం గ్యాస్ లీకేజ్ పై ప్రజలు ఆందోళన చెందవద్దు

నేటి దినపత్రిక సూర్య బ్యూరో రాజమహేంద్రవరంఅంబేద్కర్ కోనసీమ జిల్లా అంబాజీపేట మండలం మాచవరం గ్రామంలో చోటుచేసుకున్న గ్యాస్ లీకేజీ ఘటనపై జిల్లా కలెక్టర్ మహేష్ కుమార్ సోమవారం స్పందించి అదికార యంత్రాంగాన్ని అప్రమత్తం చేశారు.మాచవరం గ్రామం కళ్ల తూము దగ్గర భారత్ గ్యాస్ సిలిండర్ కంపెనీ సమీపంలో ఓఎన్జీసీ క్రూడ్ ఆయిల్ ప్రధాన పైప్ లైన్ లీక్ అయినట్లు అధికారులు గుర్తించారు. ఈ పైప్ లైన్ మామిడికుదురు ఓఎన్జీసీ నుండి పి.గన్నవరం మీదుగా మాచవరం, ముక్కామల - మడుపల్లి మీదుగా కాకినాడ వరకు వెళుతుందని తెలిపారు.లీకేజీ సమాచారం అందిన వెంటనే ఓఎన్జీసీ అధికారులు సంఘటనా స్థలానికి చేరుకుని లీకేజీని పూర్తిగా అదుపులోకి తీసుకున్నారని, ఈ ఘటనలో ఎలాంటి ప్రాణనష్టం జరగలేదని స్పష్టం చేశారు.ఈ సందర్భంగా కొత్తపేట ఆర్డీఓ జి.వి.వి. సత్యనారాయణ మాట్లాడుతూ.. కలెక్టర్ ఆదేశాల మేరకు జిల్లా యంత్రాంగం వెంటనే అప్రమత్తమైందన్నారు. సంఘటనా స్థలంలో చేరుకుని  అగ్నిమాపక సిబ్బంది, రెవెన్యూ, సంబంధిత శాఖల అధికారులు పరిస్థితిని నిరంతరం పర్యవేక్షిస్తున్నారని తెలిపారు. ఎలాంటి అపాయం జరగకుండా ముందు జాగ్రత్త చర్యగా ఫైర్ ఇంజన్లను అందుబాటులో ఉంచామన్నారు.ప్రజల భద్రతకు అత్యంత ప్రాధాన్యతనిస్తున్నామని, ప్రస్తుత పరిస్థితుల్లో ప్రమాద తీవ్రత తక్కువగానే ఉందని పేర్కొన్నారు. గ్రామ ప్రజలు భయపడాల్సిన అవసరం లేదని, అధికారుల సూచనలు పాటిస్తూ సహకరించాలని కలెక్టర్ తరపున ఆర్డీఓ విజ్ఞప్తి చేశారు. అంబాజీపేట ఎంఆర్ఓ బి. చినబాబు సంఘటనా స్థలాన్ని పరిశీలించి, స్థానిక ప్రజలకు ఎలాంటి ఇబ్బంది కలగకుండా ఓఎన్జీసీ అధికారులతో మాట్లాడి పలు జాగ్రత్తలు, సూచనలు చేశారు.

Abj.1 మాచవరం ఆయిల్ పైప్ లైన్ వద్ద ఓ ఎన్ జిసి ,రెవెన్యూ అధికారులు