స్థానిక ఎన్నికల నేపథ్యంలో పోలీసుల ఫ్లాగ్ మార్చ్

సైదాపురం మండలం మేజర్ న్యూస్  :   రాబోయే స్థానిక సంస్థల ఎన్నికల నేపథ్యంలో శాంతిభద్రతల పరిరక్షణకు, ఎన్నికలు స్వేచ్ఛగా, ప్రశాంతంగా, నిష్పక్షపాతంగా నిర్వహించేందుకు పోలీసు శాఖ ఆధ్వర్యంలో సైదాపురం మండలంలోని సైదాపురం, రామసాగరం, తూర్పుపూండ్ల గ్రామాల్లో ఫ్లాగ్ మార్చ్ నిర్వహించారు. ఈ కార్యక్రమంలో రాపూరు సర్కిల్ ఇన్‌స్పెక్టర్ మాకినేని శ్రీనివాసరావు, రాపూరు, కలువాయి పోలీస్ స్టేషన్ల ఎస్‌ఐలు, సైదాపురం ఎస్‌ఐ వి. నాగమల్లేశ్వరరావు, సర్కిల్ పరిధిలోని పోలీసు సిబ్బంది పాల్గొన్నారు. రాబోయే ఎన్నికల్లో ప్రజలు ఎలాంటి భయం, ఒత్తిడి, ప్రలోభాలకు లోనుకాకుండా తమ ఓటు హక్కును స్వేచ్ఛగా, నిర్భయంగా వినియోగించుకునేలా భరోసా కల్పించడమే ఫ్లాగ్ మార్చ్ ప్రధాన ఉద్దేశమని పోలీసులు తెలిపారు. ఎన్నికల సమయంలో గ్రామాల్లో ఎలాంటి అవాంఛనీయ సంఘటనలు చోటుచేసుకోకుండా,  శాంతిభద్రతలకు విఘాతం కలగకుండా పటిష్టమైన భద్రతా చర్యలు చేపడుతున్నట్లు పేర్కొన్నారు. ఎన్నికల ప్రక్రియకు ఆటంకం కలిగించే చర్యలకు పాల్పడితే చట్టప్రకారం కఠిన చర్యలు తీసుకుంటామని హెచ్చరించారు. ప్రజలు ఎన్నికల నియమావళిని పాటిస్తూ పోలీసులకు సహకరించాలని, పుకార్లను నమ్మవద్దని సూచించారు. శాంతిభద్రతలకు భంగం కలిగించే సంఘటనలు లేదా అనుమానాస్పద కార్యకలాపాలు గుర్తిస్తే వెంటనే పోలీసులకు సమాచారం అందించాలని కోరారు. ప్రజల సహకారంతో స్థానిక సంస్థల ఎన్నికలను ప్రశాంతంగా, పారదర్శకంగా, నిష్పక్షపాతంగా నిర్వహించేందుకు పోలీసు శాఖ కట్టుబడి ఉందని అధికారులు స్పష్టం చేశారు.