పేద విద్యార్థినికి అండగా ఉండి లయన్స్ క్లబ్

ఉండి, మేజర్ న్యూస్:పేదరికం కారణంగా ఏ ఒక్క విద్యార్థి చదువుకు దూరం కాకూడదనే లక్ష్యంతో లయన్స్ క్లబ్ నిరంతరం సేవా కార్యక్రమాలు నిర్వహిస్తుందని ఉండి లయన్స్ క్లబ్ అధ్యక్షులు, పారిశ్రామికవేత్త ద్వారంపూడి నారాయణరెడ్డి అన్నారు. సోమవారం పెదపుల్లేరు గ్రామంలో ఉండి లయన్స్ క్లబ్ ఆధ్వర్యంలో  పేద విద్యార్థినికి ఆర్థిక సహాయం అందించే కార్యక్రమం నిర్వహించారు. పెదపుల్లేరు గ్రామానికి చెందిన ఇంజినీరింగ్ ప్రధమ సంవత్సర విద్యార్థిని కుమారి జోష్న లక్ష్మీప్రియ కుటుంబ ఆర్థిక ఇబ్బందుల వల్ల చదువు ఆగిపోయే పరిస్థితి ఉందని తెలుసుకున్న లయన్స్ క్లబ్ మాజీ అధ్యక్షులు లయన్ గొట్టుముక్కల రాము, లయన్ శైలజ దంపతులు తక్షణమే స్పందించారు. తమ వంతు సహాయంగా రూ. 10,000/- ఆర్థిక సహాయాన్ని క్లబ్ అధ్యక్షులు ద్వారంపూడి నారాయణరెడ్డి చేతుల మీదుగా ఆ విద్యార్థినికి అందజేశారు.

ఈ సందర్భంగా క్లబ్ అధ్యక్షులు ద్వారంపూడి నారాయణరెడ్డి మాట్లాడుతూ సమాజంలో విద్యాభివృద్ధికి తోడ్పడేందుకు ఎంతో మంది దాతలు ముందుకు వస్తున్నారని, విద్యార్థులు ఆ సహకారాన్ని అందిపుచ్చుకుని ఆత్మవిశ్వాసంతో చదువు ముందుకు కొనసాగాలన్నారు. లయన్స్ క్లబ్ ఈ ఏడాది విద్యారంగానికి అత్యధిక ప్రాధాన్యతనిస్తూ సహాయం అందిస్తోందని చెపుతూ, ఉదారంగా స్పందించిన దాతలు రాము, శైలజ దంపతులను అభినందించారు.

క్లబ్ కార్యదర్శి రుద్రరాజు నరసరాజు మాట్లాడుతూ ఒక కుటుంబంలో మహిళ విద్యావంతురాలైతే ఆ కుటుంబంతో పాటు సమాజం కూడా బాగుపడుతుందన్నారు. విద్య అనేది ఒక వ్యక్తి జీవితాన్నే కాకుండా, మొత్తం సమాజాన్ని మార్చే శక్తివంతమైన ఆయుధమని, ఆర్థిక ఇబ్బందులు తాత్కాలికమేనని పేర్కొన్నారు. 

ఈ కార్యక్రమంలో రీజియన్ కార్యదర్శి సత్తి బ్రహ్మారెడ్డి, క్లబ్ మాజీ అధ్యక్షులు పాలతీర్ధపు నరసింగరావు, భూపతిరాజు హరనాథ రాజు, కలిదిండి సీతారామరాజు, కలిదిండి పెద అప్పలరాజు,  తదితరులు పాల్గొన్నారు.