పూలదండలకు బదులు పుస్తకాలు.. అభినందనల్లో వినూత్న ఒరవడి

                          ఎమ్మెల్యే గోరంట్లకు చిలుకూరి ప్రభాకర్ మిత్రబృందం వినూత్న సత్కారం

కడియం, మేజర్ న్యూస్ :ఎన్నికల్లో విజయం సాధించిన నాయకులను అభినందించే సంప్రదాయానికి భిన్నంగా మండల కేంద్రం కడియం యువత వినూత్న ఆలోచనకు శ్రీకారం చుట్టింది. పూలదండలు, బొకేలకు బదులుగా విద్యార్థులకు ఉపయోగపడే పుస్తకాలను బహుమతిగా అందిస్తూ అభినందనలు తెలిపింది. కడియం గ్రామానికి చెందిన యువ నాయకుడు చిలుకూరి ప్రభాకర్ తన మిత్రబృందంతో కలిసి ఎమ్మెల్యే గోరంట్ల బుచ్చయ్య చౌదరి, టీడీపీ రాష్ట్ర వైద్య విభాగ ప్రధాన కార్యదర్శి గోరంట్ల రవి రామ్ కిరణ్‌తో పాటు ఎంపీపీ అభ్యర్థిగా విజయం సాధించిన బోడపాటి మోహిని వీర పుణ్యవతి గోపాలకృష్ణ దంపతులను పుస్తకాలతో అభినందించారు.
కడియం మండలంలో జరిగిన ఎంపీటీసీ, జడ్పీటీసీ ఎన్నికల్లో కూటమి అభ్యర్థుల విజయానికి ఎమ్మెల్యే గోరంట్ల బుచ్చయ్య చౌదరి విస్తృతంగా ప్రచారం నిర్వహించారు. జడ్పీటీసీ స్థానంతో పాటు 22 ఎంపీటీసీ స్థానాలకు గాను 20 స్థానాల్లో కూటమి అభ్యర్థులు విజయం సాధించారు. ఈ నేపథ్యంలో ఎమ్మెల్యేను కలిసిన చిలుకూరి ప్రభాకర్, ఆయన మిత్రబృందం శాలువాతో సత్కరించి పుస్తకాలను అందజేశారు. ఈ కార్యక్రమంలో  యువకులు ఉత్సాహంగా పాల్గొన్నారు.