పోలింగ్ కేంద్రాలను సందర్శించి భద్రతా ఏర్పాట్లను, ఎన్నికల ప్రక్రియను పరిశీలించిన జిల్లా ఎస్పీ ఎస్.వి.మాధవ్ రెడ్డి

పాలకొండ, సూర్య :  నగరపంచాయతీ,మున్సిపల్  ఎన్నికల ప్రక్రియ ఎలాంటి అవాంఛనీయ సంఘటనలకు తావులేకుండా ప్రశాంతంగా, పారదర్శకంగా జరిగేలా జిల్లా పోలీస్ శాఖ ఆధ్వర్యంలో ప్రణాళికతో కూడిన పటిష్టమైన భద్రతా ఏర్పాట్లు చేపట్టినట్లు జిల్లా ఎస్పీ  ఎస్.వి. మాధవ్ రెడ్డి తెలిపారు. పార్వతీపురం పట్టణం, పాలకొండ, సాలూరు ప్రాంతాల్లోని పోలింగ్ కేంద్రాలను సందర్శించి అక్కడ ఏర్పాటు చేసిన భద్రతా ఏర్పాట్లను, కొనసాగుతున్న ఎన్నికల ప్రక్రియను క్షేత్రస్థాయిలో పరిశీలించారు. పోలింగ్ కేంద్రాల పరిసరాల్లో ఎలాంటి గుంపులు గుమిగూడకుండా, రాజకీయ పార్టీల కార్యకలాపాల వల్ల ఓటర్లకు ఎటువంటి ఇబ్బందులు కలగకుండా తగిన జాగ్రత్తలు తీసుకోవాలని, ఓటు వేయడానికి వచ్చే వృద్ధులు, మహిళలు, దివ్యాంగులు సహా ప్రతి ఒక్కరికీ అవసరమైన సహకారం అందిస్తూ, వారు ఎలాంటి భయాందోళనలకు గురికాకుండా ప్రశాంత వాతావరణం కల్పించాలని తెలిపారు. ఎన్నికల భద్రతను మరింత పటిష్టం చేసేందుకు అవసరమైన ప్రాంతాల్లో డ్రోన్ల ద్వారా నిఘా ఏర్పాటు చేయడంతో పాటు, సీసీ కెమెరాల ద్వారా పోలింగ్ కేంద్రాలు, పరిసర ప్రాంతాల్లో పరిస్థితులను నిరంతరం పర్యవేక్షించాలని  పోలీస్ అధికారులు, సిబ్బందికి పలు కీలక సూచనలు చేశారు. జిల్లా ఎస్పీ  మాట్లాడుతూ ఆదివారం పార్వతీపురం, సాలూరు మున్సిపల్ ఎన్నికలు అలాగే పాలకొండ నగర పంచాయతీ ఎన్నికలు జరుగుతున్నాయి. దీనికి సంబంధించి పోలీస్ శాఖ  నుంచి పటిష్టమైన బందోబస్తు ఏర్పాట్లు చేయడం జరిగిందన్నారు. ఉదయం  నుంచి కూడా ప్రజలు వచ్చి వారి ఓటు హక్కును వినియోగించుకుంటున్నారు. ఇప్పటివరకు  ఏవిధమైన అవాంచనీయ ఘటనలు జరగకండా  సజావుగా పోలింగ్  జరుగుతుందని తెలిపారు.  జిల్లా వ్యాప్తంగా దాదాపుగా 800 మంది పోలీస్ సిబ్బంది ఎన్నికల విధుల్లో పాల్గొంటున్నారు.  శిక్షణ పొందిన నూతన సిబ్బంది, మహిళా సంరక్షక కార్యదర్శి మరియు ఇతర శాఖల సిబ్బంది  ఎన్నికల విధుల్లో పాల్గొన్నారు. సమస్యాత్మక, అతి సమస్యాత్మక ప్రాంతాల్లో ఎటువంటి ఇబ్బందులు, శాంతి భద్రత సమస్యలు ఉత్పన్నం కాకుండా అదనపు  బందోబస్తు ఏర్పాటు చేయడం జరిగింది. ప్రతి ఆ రూట్స్ లో కూడా రూట్ మొబైల్స్ ఏర్పాటు చేయడం జరిగింది. స్ట్రైకింగ్ ఫోర్స్,స్పెషల్ స్ట్రైకింగ్ ఫోర్స్, క్యూఆర్టి  బృందాలు ఏర్పాటు చేసి ఎటువంటి  శాంతి భద్రత సమస్యలు లేకుండా తిరుగుతూ  జిల్లాలో ఎన్నికల ప్రక్రియ పూర్తయ్యే వరకు పోలీస్ శాఖ అప్రమత్తంగా ఉంటుందని, ప్రజల భద్రతకు, ఎన్నికలు సజావు నిర్వహణకు అత్యంత ప్రాధాన్యత ఇస్తూ నిరంతరం పర్యవేక్షణ కొనసాగిస్తామని జిల్లా ఎస్పీ  ఎస్.వి. మాధవ్ రెడ్డి స్పష్టం చేశారు.
ఈ పరిశీలనలో జిల్లా ఎస్పీ తో  పాటు పాలకొండ డి ఎస్పీ ఎం. రాంబాబు, సిఐ ప్రసాదరావు, ఎస్సై వెంకన్న,పోలీస్ అధికారులు, సిబ్బంది పాల్గొన్నారు.