పిఠాపురంలో వైసీపీ ఘన విజయం.. ఓటమిని జీర్ణించుకోలేక స్కూల్ ఎన్నికలను రద్దు చేయించారన్న వైయస్సార్సీపీ
సూర్య ఆంధ్రప్రదేశ్ డెస్క్: డిప్యూటీ సీఎం పవన్ కళ్యాణ్ ప్రాతినిధ్యం వహిస్తున్న కాకినాడ జిల్లా పిఠాపురం నియోజకవర్గంలో స్కూల్ కమిటీ ఎన్నికలు రాజకీయంగా తీవ్ర దుమారం రేపాయి. పిఠాపురం నియోజకవర్గంలో జరిగిన పాఠశాల కమిటీ ఎన్నికల్లో వైయస్సార్సీపీ బలపరిచిన అభ్యర్థులు ఘన విజయం సాధించారు. కొడవలి పాఠశాల కమిటీ ఎన్నికల్లో వైసీపీ అభ్యర్థి రెండవసారి కూడా ఛైర్మన్గా ఘన విజయం సాధించినట్లు పార్టీ వర్గాలు వెల్లడించాయి. అలాగే గొల్లప్రోలు మండలం చెందుర్తిలో ఉన్న మూడు పాఠశాలలకు జరిగిన ఎన్నికల్లో ఇద్దరు వైసీపీ ఛైర్మన్ అభ్యర్థులు ఏకగ్రీవంగా ఎన్నికయ్యారు.
అయితే, ఎంపీపీ యూపీ పాఠశాల కమిటీకి జరిగిన ఎన్నికల్లో జనసేన ఛైర్మన్ అభ్యర్థి నూకరాజుపై వైసీపీ అభ్యర్థి శివ నాగేశ్వరరావు ఘన విజయం సాధించారు. సొంత నియోజకవర్గంలో తమ పార్టీ అభ్యర్థుల ఓటమిని జనసేన నాయకులు జీర్ణించుకోలేకపోతున్నారని వైయస్సార్సీపీ నేతలు మండిపడ్డారు. కాకినాడ ఎంపీ ఉదయ్ శ్రీనివాస్, జనసేన జిల్లా అధ్యక్షుడు తుమ్మల బాబు తదితరుల ఒత్తిడి మేరకే అధికారులు ఎన్నికలను రద్దు చేశారని ఆరోపించారు. ఓటమి భయంతోనే అధికార పార్టీ నేతలు అధికారులపై ఒత్తిడి తెచ్చి ఎన్నికల ఫలితాలను అడ్డుకున్నారని విపక్ష నేతలు తీవ్ర స్థాయిలో ధ్వజమెత్తారు.
