పి.గన్నవరం టీడీపీ ఇన్చార్జిగా మోకా ఆనందసాగర్ నియామకం
సూర్య ఆంధ్రప్రదేశ్ డెస్క్: డాక్టర్ బీఆర్ అంబేడ్కర్ కోనసీమ జిల్లా పి.గన్నవరం నియోజకవర్గ తెలుగుదేశం పార్టీ ఇన్చార్జిగా సీనియర్ నేత మోకా ఆనందసాగర్ నియమితులయ్యారు. ఈ మేరకు టీడీపీ రాష్ట్ర అధ్యక్షుడు పల్లా శ్రీనివాసరావు సంతకం చేసిన అధికారిక నియామక పత్రం తనకు అందినట్లు ఆనందసాగర్ వెల్లడించారు. గత ఏడేళ్లుగా పి.గన్నవరం నియోజకవర్గంలో టీడీపీ ఇన్చార్జి పదవి భర్తీ కాకుండా పెండింగ్లో ఉండగా, తాజా నియామకంతో సుదీర్ఘ నిరీక్షణకు తెరపడింది. ఈ నిర్ణయంతో నియోజకవర్గవ్యాప్తంగా పార్టీ నాయకులు, కార్యకర్తల్లో నూతనోత్సాహం నెలకొంది.
ఈ సందర్భంగా మోకా ఆనందసాగర్ మాట్లాడుతూ పార్టీ అధిష్టానం తనపై ఉంచిన అపారమైన నమ్మకాన్ని నిలబెట్టుకుంటానని స్పష్టం చేశారు. నియోజకవర్గ బాధ్యతలకు పూర్తి న్యాయం చేస్తూ, క్షేత్రస్థాయిలో పార్టీ పటిష్టతకు, అభివృద్ధికి అహర్నిశలు కృషి చేస్తానని తెలిపారు. తనకు ఈ గురుతర బాధ్యతను అప్పగించిన టీడీపీ జాతీయ అధ్యక్షుడు, ముఖ్యమంత్రి నారా చంద్రబాబు నాయుడు, జనసేనాని, ఉప ముఖ్యమంత్రి పవన్ కళ్యాణ్, మంత్రి నారా లోకేష్ మరియు రాష్ట్ర అధ్యక్షుడు పల్లా శ్రీనివాసరావులకు ఆయన ప్రత్యేక కృతజ్ఞతలు తెలియజేశారు.
కూటమి ప్రభుత్వ సంక్షేమ పథకాలు, అభివృద్ధి కార్యక్రమాలను నియోజకవర్గంలోని ప్రతి గడపకూ చేరవేసేలా శ్రేణులను సమన్వయం చేసుకుంటూ ముందుకు సాగుతానని ఆనందసాగర్ పేర్కొన్నారు. ప్రజా సమస్యల పరిష్కారమే లక్ష్యంగా పనిచేస్తూ, పార్టీ క్యాడర్కు ఎల్లవేళలా అందుబాటులో ఉంటానని భరోసా ఇచ్చారు. కార్యకర్తలే పార్టీకి బలమైన పునాది అని, వారందరినీ కలుపుకుని పి.గన్నవరంలో తెలుగుదేశం పార్టీని తిరుగులేని శక్తిగా తీర్చిదిద్దుతామని ధీమా వ్యక్తం చేశారు.
మోకా ఆనందసాగర్ ఇన్చార్జిగా నియమితులైన విషయం తెలియగానే నియోజకవర్గంలోని వివిధ మండలాల నుంచి పార్టీ శ్రేణులు, అభిమానులు ఆయనకు ఘనంగా శుభాకాంక్షలు తెలిపారు. బాణసంచా కాల్చి, మిఠాయిలు పంచుకుంటూ సంబరాలు చేసుకున్నారు. సుదీర్ఘకాలం తర్వాత నాయకత్వ బాధ్యతలు సమర్థుడైన నేతకు దక్కడం పట్ల స్థానిక నాయకులు హర్షం వ్యక్తం చేస్తూ అధిష్టాన నిర్ణయాన్ని స్వాగతించారు.
