పట్టభద్రుల ఉపాధ్యాయ ఎమ్మెల్సీ ఎన్నికలకు ఓటును నమోదు చేసుకోవాలి

నేటి దినపత్రిక సూర్య బ్యూరో రాజమహేంద్రవరంపట్టభద్రులు, ఉపాధ్యాయ ఎమ్మెల్సీ ఎన్నికల్లో అర్హులైన ఓటర్లు తమ ఓటు హక్కును వినియోగించుకునేందుకు తప్పనిసరిగా ఓటరు జాబితాలో పేరును నమోదు చేసుకోవాలని జిల్లా కలెక్టర్ డా. మహేష్ కుమార్ రావిరాల సూచించారు. సోమవారం వీడియో కాన్ఫరెన్స్ ద్వారా జిల్లా అధికారులతో అర్హులైన పట్టభద్రులు, ఉపాధ్యాయులు ఎన్నికల నిబంధనలకు అనుగుణంగా నిర్ణీత దరఖాస్తు ఫారాలను సమర్పించి ఓటరుగా నమోదు చేసుకోవాలని తెలిపారు.

 ఈ సందర్భంగా జిల్లా కలెక్టర్ మాట్లాడుతూ జిల్లాలో ఎమ్మెల్సీ ఓటర్ల నమోదు ప్రక్రియను సమర్థవంతంగా నిర్వహించేందుకు అవసరమైన ఫారం-19లను జిల్లా వ్యాప్తంగా అందుబాటులో ఉంచినట్లు తెలిపారు. అర్హులైన పట్టభద్రులు, ఉపాధ్యాయులు సంబంధిత అధికారులను సంప్రదించి నిర్ణీత గడువులోగా దరఖాస్తు చేసుకోవాలని సూచించారు.

ఓటరు నమోదు ప్రక్రియపై అవగాహన కల్పించేందుకు తహసీల్దార్లు, మండల విద్యాశాఖ అధికారులు ఎంఈఓలు ఎంపీడీఓలు సంబంధిత ఉపాధ్యాయ సంఘాల ప్రతినిధులతో సమన్వయం చేసుకోవాలని కలెక్టర్ ఆదేశించారు. మండల స్థాయిలో సమావేశాలు నిర్వహించి, అర్హులైన పట్టభద్రులు, ఉపాధ్యాయులకు ఓటరు నమోదు విధానం, అర్హతలు, అవసరమైన ధ్రువపత్రాలు, దరఖాస్తు సమర్పణపై అవగాహన కల్పించాలని సూచించారు.ప్రతి అర్హుడికి ఓటరు నమోదు ప్రక్రియపై సమాచారం చేరేలా సంబంధిత శాఖల అధికారులు చర్యలు తీసుకోవాలని తెలిపారు. అర్హులైన పట్టభద్రులు, ఉపాధ్యాయులు ఈ అవకాశాన్ని సద్వినియోగం చేసుకుని ప్రజాస్వామ్య ప్రక్రియలో భాగస్వాములు కావాలని జిల్లా కలెక్టర్ పిలుపునిచ్చారు.