పరిశ్రమల ఏర్పాటులో పురోగతిని వేగవంతం చేయాలి* *పెండింగ్‌లో ఉన్న పారిశ్రామిక ప్రాజెక్టులను త్వరితగతిన పూర్తి చేయాలి* *జిల్లా కలెక్టర్ డా.ఏ.సిరి*
కర్నూలు మేజర్ న్యూస్ ప్రతినిధి:అక్టోబర్ 29:- జిల్లాలో అమలులో ఉన్న పారిశ్రామిక ప్రాజెక్టులను వేగవంతం చేయడంతో పాటు, కొత్తగా ఏర్పాటు చేయనున్న పరిశ్రమలకు అవసరమైన మౌలిక వసతులను త్వరితగతిన కల్పించాలని జిల్లా కలెక్టర్ డా. ఏ.సిరి పరిశ్రమ శాఖ అధికారులను ఆదేశించారు.
గురువారం కలెక్టరేట్ లో పారిశ్రామిక అభివృద్ధి, పరిశ్రమల స్థాపనకు సంబంధించిన వివిధ అంశాలపై కలెక్టర్ సంబంధిత అధికారులతో సమీక్ష నిర్వహించారు.
ఈ సందర్భంగా కలెక్టర్ ముందుగా ఓర్వకల్లు పారిశ్రామిక ప్రాంతంలో ఏర్పాటు చేయనున్న పరిశ్రమల వారీగా పురోగతిని సమీక్షిస్తూ, ఆయా పరిశ్రమల స్థాపనకు సంబంధించిన ప్రస్తుత స్థితిగతులను తెలుసుకుని, పనులను వేగవంతం చేసేలా చర్యలు తీసుకోవాలని కలెక్టర్ సంబంధిత అధికారులను ఆదేశించారు. అదే విధంగా జిల్లాలో వివిధ ప్రాంతాల్లో ఏర్పాటు చేస్తున్న పునరుత్పాదక ఇంధన ప్రాజెక్టులైన పవన విద్యుత్, సౌర విద్యుత్ ప్రాజెక్టులకు సంబంధించి పెండింగ్‌లో ఉన్న పనులను నిర్దేశిత లక్ష్యాల మేరకు పూర్తి చేసేలా చర్యలు తీసుకోవాలని కలెక్టర్ సంబంధిత అధికారులను ఆదేశించారు.
జిల్లాలో నియోజకవర్గాల వారీగా ప్రతిపాదించిన సూక్ష్మ, చిన్న, మధ్యతరహా పరిశ్రమల (ఎంఎస్ఎంఈ) పార్కుల ఏర్పాటుకు సంబంధించిన ప్రస్తుత స్థితిగతులను అడిగి తెలుసుకున్నారు. పారిశ్రామిక పార్కుల్లో రహదారులు, విద్యుత్, నీటి సరఫరా తదితర అవసరమైన మౌలిక వసతుల కల్పనకు ప్రాధాన్యతనిస్తూ, పనులను వీలైనంత త్వరగా పూర్తి చేయాలని కలెక్టర్ సంబంధిత అధికారులను ఆదేశించారు.
సమావేశంలో పరిశ్రమల శాఖ అధికారి సంజీవ రాజు, ఏపిఐఐసి జెడ్ ఎం మధుసూదన్ రెడ్డి, నెడ్ క్యాప్ అధికారి వీరేంద్ర, తదితరులు పాల్గొన్నారు..
