andhrapradesh
పల్నాడు జిల్లాలో ఘోర రోడ్డు ప్రమాదాలు: నలుగురు యువకులు దుర్మరణం
పెదకూరపాడు:పల్నాడు జిల్లా పెదకూరపాడు మండలంలో బుధవారం వేర్వేరు చోట్ల జరిగిన రెండు ఘోర రోడ్డు ప్రమాదాల్లో నలుగురు యువకులు ప్రాణాలు కోల్పోయారు. ఈ ప్రమాదాలతో మండల వ్యాప్తంగా తీవ్ర శోకసంద్రం అలుముకుంది.
మొదటి ప్రమాదం పెదకూరపాడు నుంచి గుంటూరు వెళ్లే రహదారిపై చోటుచేసుకుంది. ద్విచక్రవాహనంపై గుంటూరు వైపు వెళ్తున్న ఇద్దరు యువకులను ఒక గుర్తుతెలియని వాహనం వేగంగా వచ్చి ఢీకొట్టింది. ఈ ప్రమాదంలో పెదకూరపాడుకు చెందిన కొరగంటి విజయ్, గుడిపూడి గౌతమ్ తీవ్రంగా గాయపడి అక్కడికక్కడే మృతి చెందారు.
అలాగే, 75 తాళ్లూరులోని 11 కేవీ విద్యుత్ సబ్‌స్టేషన్ వద్ద మరో ఘోర ప్రమాదం జరిగింది. వేగంగా వచ్చిన ఒక టిప్పర్ లారీ ద్విచక్రవాహనాన్ని ఢీకొట్టడంతో బలుసుపాడు గ్రామానికి చెందిన చిన్నం నాగేంద్రబాబు, తాళ్లూరి తిరుపతిరావు తీవ్రగాయాలతో ప్రాణాలు కోల్పోయారు.
సమాచారం అందుకున్న స్థానిక పోలీసులు సంఘటనా స్థలాలకు చేరుకుని పరిశీలించారు. మృతదేహాలను పోస్టుమార్టం నిమిత్తం ప్రభుత్వ ఆసుపత్రికి తరలించారు. ఈ ఘటనలపై కేసులు నమోదు చేసిన పోలీసులు, ప్రమాదాలకు కారణమైన వాహనాలను గుర్తించేందుకు దర్యాప్తు వేగవంతం చేశారు.
