ఒకే తల.. రెండు శరీరాలు.. ఎనిమిది కాళ్లు!

భోగాపురం, మేజర్ న్యూస్: ప్రకృతి సృష్టిలో ఎన్నో వింతలు.. విశేషాలు. అలాంటి అరుదైన ఘటనే భోగాపురం మండలంలో చోటుచేసుకుంది. ఒకే తలతో రెండు శరీరాలు, ఎనిమిది కాళ్లతో గొర్రె పిల్ల జన్మించడం స్థానికంగా తీవ్ర ఆసక్తిని రేకెత్తించింది. ఈ వింత జననం చూసిన వారిని సంభ్రమాశ్చర్యాలకు గురిచేసింది. భోగాపురం మేజర్ పంచాయితీ కేశవ కల్లాలువద్ద నరెడ్ల శివాజీ కోళ్ల ఫారం సమీపంలో అలబాని బంగారికి చెందిన గొర్రె తొలి కాన్పులో ఈ వింత ఆకారంలో ఉన్న గొర్రె పిల్లకు జన్మనిచ్చింది. సాధారణ గొర్రె పిల్లలకు భిన్నంగా ఒకే తల, రెండు శరీరాలు, ఎనిమిది కాళ్లతో ఉండటాన్ని చూసి స్థానికులు ఆశ్చర్యపోయారు. ఈ విషయం చుట్టుపక్కల ప్రాంతాలకు వ్యాపించడంతో వింత గొర్రె పిల్లను చూసేందుకు దూర ప్రాంతాల నుంచి సైతం ప్రజలు తరలివచ్చారు.ఇంతటి అరుదైన జననాన్ని గతంలో ఎన్నడూ చూడలేదని పలువురు ఆశ్చర్యం వ్యక్తం చేశారు. ఈ ఘటనపై ముంజేరు పశువైద్యాధికారి యూత్ రామరాజును 'సూర్య' ప్రతినిధి వివరణ కోరగా.. జన్యుపరమైన లోపాల కారణంగా ఇలాంటి అరుదైన ఆకారాలతో జీవులు జన్మించే అవకాశం ఉంటుందని తెలిపారు.

 రిపోర్టర్: శ్రీనివాస్, భోగాపురం.