నిబంధనలు ఉల్లంఘిస్తే కఠిన చర్యలు: టూటౌన్ సీఐ పి. శ్రీనివాసరావు హెచ్చరిక.
కావలి మేజర్ న్యూస్: కావలి పట్టణంలో రోజురోజుకూ పెరుగుతున్న ట్రాఫిక్ సమస్యలు, ప్రమాదాల నివారణే లక్ష్యంగా రెండో పట్టణ పోలీసులు రంగంలోకి దిగారు. ట్రాఫిక్ క్రమబద్ధీకరణ చర్యల్లో భాగంగా బుధవారం ఉదయగిరి బ్రిడ్జి సెంటర్ వద్ద రెండో పట్టణ సీఐ పి. శ్రీనివాసరావు స్వయంగా ట్రాఫిక్ పరిస్థితిని పర్యవేక్షించారు. నూతనంగా బాధ్యతలు స్వీకరించిన సీఐ పి. శ్రీనివాసరావు, ప్రాదేశిక ఎన్నికల సమయంలో ఎలాంటి అవాంఛనీయ సంఘటనలు జరగకుండా సమర్థవంతంగా విధులు నిర్వహించారు. అనంతరం పట్టణంలో ప్రధాన సమస్యగా మారిన ట్రాఫిక్ రద్దీపై దృష్టి సారించారు. ఈ క్రమంలో ఉదయగిరి బ్రిడ్జి ప్రాంతంతో పాటు రోడ్డుకి ఇరువైపులా ఉన్న దుకాణాలు, అక్కడ నిలిపే ద్విచక్ర వాహనాలు, ఆటోల వల్ల వాహనదారులకు కలుగుతున్న అంతరాయాలను ఆయన క్షుణ్ణంగా పరిశీలించారు. ఈ సందర్భంగా దుకాణదారులకు, వాహనదారులకు సీఐ పలు సూచనలు, సలహాలు ఇచ్చారు. రోడ్లపైకి ఆక్రమణలు రాకుండా చూడాలని దుకాణదారులను కోరారు. అనంతరం సర్కిల్ ఇన్స్పెక్టర్ పి. శ్రీనివాసరావు మాట్లాడుతూ... "ట్రాఫిక్ నిబంధనలను ప్రతి ఒక్కరూ తప్పనిసరిగా పాటించాలి. ద్విచక్ర వాహనదారులు తప్పక హెల్మెట్ ధరించాలి. ఎవరైనా రూల్స్ అతిక్రమిస్తే చట్టం తన పని తాను చేసుకుపోతుంది. నిబంధనలు ఉల్లంఘించే వారిపై ఉపేక్షించేది లేదు, కఠిన చర్యలు తీసుకుంటాం" అని స్పష్టం చేశారు. ఈ కార్యక్రమంలో రెండో పట్టణ ఎస్సైలు, పోలీస్ సిబ్బంది పాల్గొన్నారు.
