నెల్లూరు రైల్వే స్టేషన్‌లో పారిశుద్ధ్య కార్మికుల మెరుపు సమ్మె

నెల్లూరు కల్చరల్ మేజర్ న్యూస్   :    నెల్లూరు రైల్వే స్టేషన్‌లో ఎటువంటి ముందస్తు నోటీసు లేకుండా నలుగురు పారిశుద్ధ్య కార్మికులను విధుల నుంచి తొలగించడాన్ని నిరసిస్తూ కాంట్రాక్ట్ కార్మికులు మెరుపు సమ్మెకు దిగారు. కాంట్రాక్టర్ రంగస్వామి తమ ఖాతాల్లో జమైన రూ.18,000 బోనస్‌ను బలవంతంగా వెనక్కి తీసుకోవడంతో పాటు, రెండు నెలలుగా జీతాలు చెల్లించకుండా వ్యక్తిగత పనులకు వాడుకుంటున్నారని, అలాగే సూపర్వైజర్ సురేష్ మహిళా కార్మికులతో అసభ్యంగా ప్రవర్తిస్తున్నారని కార్మికులు ఆరోపించారు. ఈ సమస్యల పరిష్కారం కోసం సిఐటియు నాయకులు, న్యాయవాదుల సంఘం ప్రతినిధులతో కలిసి స్టేషన్ మేనేజర్ శివయ్యకు వినతిపత్రం అందజేశారు. తొలగించిన కార్మికులను తక్షణమే తిరిగి విధుల్లోకి తీసుకొని, వారి బోనస్ డబ్బులు చెల్లించే వరకు తమ సమ్మె కొనసాగుతుందని సిఐటియు నాయకులు స్పష్టం చేశారు.