andhrapradesh
నకరికల్లులో విత్తనాల దుకాణంపై వ్యవసాయ అధికారుల ఆకస్మిక తనిఖీ.
నకరికల్లు మేజర్ న్యూస్:
మండల కేంద్రంలోని ఎన్. చిన్నయ్య అండ్ సన్స్ విత్తనాల దుకాణాన్ని మండల వ్యవసాయ అధికారి కే. దేవదాస్ ఆకస్మికంగా తనిఖీ చేశారు. ఈ సందర్భంగా దుకాణానికి సంబంధించిన గోదాములోని విత్తన నిల్వలు, బిల్లుబుక్కులు, స్టాక్ రిజిస్టర్, స్టాక్ బోర్డులను పరిశీలించారు.
గోదాములో భౌతికంగా నిల్వ ఉన్న విత్తనాలను తనిఖీ చేసి నాలుగు నమూనాలను సేకరించారు. వాటిని నాణ్యతా పరీక్షల నిమిత్తం ప్రయోగశాలకు పంపించినట్లు వ్యవసాయ అధికారి తెలిపారు.
ఈ సందర్భంగా కే. దేవదాస్ మాట్లాడుతూ రైతులు వ్యవసాయ శాఖ నుంచి లైసెన్స్ పొందిన డీలర్ల వద్ద మాత్రమే విత్తనాలు కొనుగోలు చేయాలని సూచించారు. విత్తనాలు కొనుగోలు చేసినప్పుడు తప్పనిసరిగా విక్రయ రసీదు తీసుకోవాలని, రసీదుపై పంట రకం, లాట్ నంబరు, అమ్మిన వారి సంతకం, కొనుగోలు చేసిన వారి సంతకం ఉండేలా చూసుకోవాలని తెలిపారు. నిబంధనలను తప్పనిసరిగా పాటించాలని డీలర్లను హెచ్చరించారు.
ఈ కార్యక్రమంలో ఏఈఓ కే. దిలీప్ కుమార్, గ్రామ వ్యవసాయ సహాయకుడు వై. ప్రభాకర్, దుకాణ సిబ్బంది పాల్గొన్నారు.