మున్సిపల్ ఎన్నికల నేపథ్యంలో చిలకలూరిపేటలో పోలీసుల సాయుధ కవాతు 150 మంది పోలీసు బలగాలతో ఫ్లాగ్ మార్చ్.. శాంతిభద్రతల పరిరక్షణకు ప్రత్యేక చర్యలు

చిలకలూరిపేట మేజర్ న్యూస్: 

రాబోయే మున్సిపల్ ఎన్నికలను ప్రశాంత వాతావరణంలో నిర్వహించేందుకు,పట్టణంలో శాంతిభద్రతలను కాపాడటంతో పాటు ప్రజల్లో భద్రతా భావాన్ని పెంపొందించేందుకు పోలీసులు సాయుధ కవాతు నిర్వహించారు.పల్నాడు జిల్లా ఎస్పీ శ్రీ జగదీష్ ఆదహళ్లి ఆదేశాలు,సూచనల మేరకు శుక్రవారం సాయంత్రం ఈ కార్యక్రమం చేపట్టారు.చిలకలూరిపేట టౌన్ సీఐ పి. రమేష్ నేతృత్వంలో సుమారు 150 మంది ప్రత్యేక పోలీసు బలగాలు ఈ కవాతులో పాల్గొన్నాయి.పట్టణంలోని ఎన్ఆర్టీ సెంటర్ నుంచి ప్రారంభమైన కవాతు చౌత్రా సెంటర్,కళామందిర్ సెంటర్ మీదుగా అడ్డరోడ్డు వరకు కొనసాగింది.పట్టణంలోని సున్నితమైన,అత్యంత సున్నితమైన ప్రాంతాల్లో పోలీసులు కవాతు నిర్వహించి ప్రజలకు భద్రతపై భరోసా కల్పించారు.రానున్న మున్సిపల్ ఎన్నికల సమయంలో ఎలాంటి అవాంఛనీయ ఘటనలు చోటుచేసుకోకుండా పోలీసు శాఖ ముందస్తు చర్యలు చేపడుతోంది. ఎన్నికల ప్రక్రియలో ప్రజలు ఎలాంటి భయం,ఒత్తిడికి గురికాకుండా స్వేచ్ఛగా తమ ఓటు హక్కును వినియోగించుకునేలా పోలీసు యంత్రాంగం అప్రమత్తంగా ఉందనే సందేశాన్ని ఈ కవాతు ద్వారా ప్రజల్లోకి తీసుకెళ్లారు.ఎన్నికల సమయంలో శాంతిభద్రతలకు విఘాతం కలిగించే చర్యలకు పాల్పడకుండా ప్రజలకు అవగాహన కల్పించడంతో పాటు, పట్టణంలో పోలీసుల నిఘా కొనసాగుతుందని ఈ కార్యక్రమం ద్వారా స్పష్టం చేశారు.ఈ కవాతులో టౌన్ సీఐ పి. రమేష్‌తో పాటు ఎస్ఐలు సోమేశ్వరరావు,హాజరత్తయ్య,టౌన్ పోలీసు సిబ్బంది పాల్గొన్నారు.