రాయచోటి ప్రతినిధి మేజర్ న్యూస్ : అన్నమయ్య జిల్లా పర్యటనలో భాగంగా సోమవారం నాడు రాయచోటికి విచ్చేసిన జిల్లా ఇన్చార్జి మంత్రి బీసీ జనార్దన్ రెడ్డికి రాష్ట్ర రవాణా, యువజన, క్రీడా శాఖ మంత్రి మండిపల్లి రాంప్రసాద్ రెడ్డి ఘన స్వాగతం పలికారు. ఈ సందర్భంగా రాయచోటి మున్సిపల్ చైర్మన్‌గా ఎన్నికైన బోనమల ఖాదరవలిని జిల్లా ఇన్చార్జి మంత్రి బీసీ జనార్దన్ రెడ్డి ప్రత్యేకంగా అభినందించి శుభాకాంక్షలు తెలిపారు. రాయచోటి మున్సిపాలిటీలో కూటమి 44 వార్డులకు 44 స్థానాలను ఏకగ్రీవంగా సాధించడం విశేషమన్నారు. ప్రజలు తమపై ఉంచిన నమ్మకాన్ని నిలబెట్టుకుంటూ పట్టణ అభివృద్ధికి ప్రాధాన్యత ఇవ్వాలని ఈ సందర్భంగా ఆకాంక్షించారు. ప్రజలకు మెరుగైన మౌలిక సదుపాయాలు కల్పిస్తూ, పట్టణాన్ని అన్ని రంగాల్లో అభివృద్ధి చేసేందుకు కృషి చేయాలని సూచించారు. ముఖ్యమంత్రి నారా చంద్రబాబు నాయుడు నాయకత్వంలో, మంత్రి మండిపల్లి రాంప్రసాద్ రెడ్డి మార్గదర్శకత్వంలో రాయచోటి పట్టణ అభివృద్ధికి సమష్టిగా కృషి చేస్తామని ఈ సందర్భంగా పేర్కొన్నారు.
