ముంచేసిన మురసు తుఫాన్.. దిక్కుతోచని స్థితిలో రైతన్నలు.
అనపర్తి, మేజర్ న్యూస్:అర్నబ్ తుఫాన్ సృష్టించిన నష్టం నుంచి కోలుకోకముందే మురసు తుఫాన్ రైతాంగాన్ని మరింత కష్టాల్లోకి నెట్టింది. వరుస తుఫాన్లు, ఎడతెరిపి లేకుండా కురుస్తున్న వర్షాలు అన్నదాతల ఆశలపై నీళ్లు చల్లాయి. నెలల తరబడి కష్టపడి సాగు చేసిన వరి పంట చేతికొచ్చే సమయంలో తుఫాన్ రూపంలో విరుచుకుపడిన ప్రకృతి వైపరీత్యం రైతులకు తీవ్ర నష్టాన్ని మిగిల్చింది. పంట కోతకు సిద్ధంగా ఉన్నప్పటికీ వర్షాల కారణంగా పొలాల్లోకి వెళ్లి కోతలు కోసే పరిస్థితి లేకపోవడంతో రైతులు తీవ్ర ఆందోళనకు గురవుతున్నారు. అర్నబ్ తుఫాన్ ప్రభావంతో ఇప్పటికే అనపర్తి నియోజకవర్గంలోని పలు గ్రామాల్లో వరి పంట నేలకొరిగి, పొలాల్లో నీరు నిలిచిపోయింది. కోతకు సిద్ధంగా ఉన్న పంట నీటిలో నానిపోవడంతో అనేక ప్రాంతాల్లో ధాన్యం మొలకెత్తింది. దీంతో రైతులు తీవ్రంగా నష్టపోయారు.
ఈ నష్టం నుంచి బయటపడకముందే మురసు తుఫాన్ ప్రభావంతో మళ్లీ భారీ వర్షాలు కురవడం రైతుల పరిస్థితిని మరింత దిగజార్చింది. సాధారణంగా వరి పంట కోతకు వచ్చిన సమయంలో రైతులు యంత్రాల సహాయంతో ధాన్యాన్ని త్వరగా ఒబ్బిడి చేసుకుంటారు. అయితే వరుస వర్షాల కారణంగా చేలల్లో నీరు నిలిచిపోవడం, నేల బురదమయంగా మారడంతో హార్వెస్టర్ యంత్రాలు పొలాల్లోకి వెళ్లలేని పరిస్థితి ఏర్పడింది. కొన్ని ప్రాంతాల్లో నేలకొరిగిన వరి కంకులు నీటిలో మునిగిపోవడంతో ధాన్యం నాణ్యత దెబ్బతినే ప్రమాదం నెలకొంది. ఇప్పటికే కోసి పొలాల్లో ఆరబెట్టిన ధాన్యం సైతం వర్షపు నీటికి తడిసిపోయింది. దీంతో రైతులకు పంటను కాపాడుకోవడం పెద్ద సవాలుగా మారింది. ఇప్పుడు మురసు తుఫాన్ కారణంగా కురిసిన వర్షాలు మిగిలిన పంటను కూడా దెబ్బతీస్తున్నాయి. పంట చేతికొచ్చే సమయంలో పెట్టుబడులు, ఎరువులు, పురుగుమందులు, కూలీల ఖర్చులు అన్నీ భారంగా మారగా, దిగుబడి చేతికి అందకపోవడంతో రైతులు అప్పుల ఊబిలో కూరుకుపోయే పరిస్థితి కనిపిస్తోంది. వరుస తుఫాన్లతో నష్టపోయిన రైతాంగాన్ని ప్రభుత్వం తక్షణమే ఆదుకోవాలని రైతులు కోరుతున్నారు.
గ్రామాల వారీగా పంట నష్టాన్ని క్షేత్రస్థాయిలో పరిశీలించి సమగ్ర సర్వే నిర్వహించాలని, దెబ్బతిన్న ప్రతి ఎకరాకు నష్టపరిహారం అందించాలని విజ్ఞప్తి చేస్తున్నారు. తడిసిన, మొలకెత్తిన ధాన్యాన్ని ప్రభుత్వ కొనుగోలు కేంద్రాల ద్వారా కొనుగోలు చేసేలా చర్యలు తీసుకోవాలని కోరుతున్నారు. పంటల బీమా పరిహారాన్ని త్వరితగతిన అందించడంతో పాటు రైతులకు అవసరమైన సహాయాన్ని అందించాలని ఆశిస్తున్నారు.
