మొబైల్‌ కోర్టులో 14 కేసులు.. రూ.3,810 జరిమానా
విజయవాడ కార్పొరేషన్, మేజర్ న్యూస్ : నగరంలో పారిశుద్ధ్య నిబంధనలు ఉల్లంఘించిన వారిపై విజయవాడ నగరపాలక సంస్థ అధికారులు చర్యలు చేపట్టారు. కమిషనర్ ధ్యానచంద్ర ఆదేశాల మేరకు శుక్రవారం పటమటలోని సర్కిల్‌3 కార్యాలయంలో మొబైల్‌ కోర్టు నిర్వహించారు. రహదారులపై చెత్త వేయడం, పశువులు, పెంపుడు కుక్కలను విచ్చలవిడిగా వదిలేయడం, కాలువల్లో వ్యర్థాలు వేయడం, వ్యాపార అనుమతులు లేకుండా కార్యకలాపాలు నిర్వహించడం వంటి ఉల్లంఘనలకు సంబంధించి 14 కేసులు నమోదు చేశారు. నిందితులను న్యాయమూర్తి కె. నరేంద్రరెడ్డి ఎదుట హాజరుపరచగా, విచారణ అనంతరం మొత్తం రూ.3,810 జరిమానా విధించారు. నగర పరిశుభ్రతకు భంగం కలిగించే చర్యలకు పాల్పడితే భవిష్యత్తులోనూ మొబైల్‌ కోర్టుల ద్వారా చర్యలు తీసుకుంటామని అధికారులు హెచ్చరించారు. కార్యక్రమంలో సహాయ వైద్య ఆరోగ్య అధికారి గోపాల నాయక్‌, పారిశుద్ధ్య పర్యవేక్షకులు రమేష్‌బాబు, శ్రీనివాసమూర్తి, పారిశుద్ధ్య తనిఖీ అధికారులు, కార్యదర్శులు పాల్గొన్నారు.
✍️ప్రేమ్ రాజ్, విజయవాడ, ఎన్టీఆర్ జిల్లా
