మిట్స్లో ఆర్థిక అక్షరాస్యత,స్మార్ట్ పెట్టుబడి విధానాలపై వర్క్షాప్ : ముఖ్యఅతిథిగా హాజరైన సెబీ స్మార్ట్ ప్రతినిధి డాక్టర్ మూర్తి
కురబలకోట,మేజర్ న్యూస్ : మదనపల్లి సమీపంలో గల (మదనపల్లె ఇన్స్టిట్యూట్ ఆఫ్ టెక్నాలజీ అండ్ సైన్స్) మిట్స్ డీమ్డ్ టు బి యూనివర్సిటీలోని స్కూల్ ఆఫ్ మేనేజ్మెంట్ విభాగం వారు ఆదిత్య బిర్లా క్యాపిటల్ ఫౌండేషన్ సహకారంతో విద్యార్థులకు ఫైనాన్షియల్ లిటరసీ అండ్ స్మార్ట్ ఇన్వెస్ట్మెంట్ ప్రాక్టీసెస్ అనే అంశంపై రెండు రోజులపాటు వర్క్షాప్ నిర్వహించారు.శనివారం ఈ కార్యక్రమానికి ముఖ్య అతిథిగా సెబీ స్మార్ట్ ప్రతినిధి డాక్టర్ మూర్తి పాల్గొని,విద్యార్థులకు ఆర్థిక అక్షరాస్యత,పొదుపు,పెట్టుబడి ప్రణాళికలు,ఆధునిక ఆర్థిక మార్కెట్లపై అవగాహన కల్పించారు.ఈ సందర్భంగా ఆయన మాట్లాడుతూ రెపో రేటు,రివర్స్ రెపోరేటు,గోల్డ్ ఈటీఎఫ్లు,సిల్వర్ ఈటీఎఫ్లు,స్టాక్ మార్కెట్లో ప్రత్యక్ష ట్రేడింగ్,మ్యూచువల్ ఫండ్స్,ఆర్థిక వ్యవస్థలో నగదు చలామణి తదితర అంశాలను వివరించారు.అదేవిధంగా షేర్ల కొనుగోలు,విక్రయాలు,డీమ్యాట్ ఖాతా వినియోగం,పెట్టుబడులపై రాబడులు,మార్కెట్ ఒడిదొడుకులు,ద్రవ్యోల్బణం ప్రభావం వంటి అంశాలను ఉదాహరణలతో వివరించారు.విద్యార్థులు తమ ఆదాయానికి అనుగుణంగా బడ్జెట్ రూపొందించుకోవడం,అనవసర ఖర్చులను నియంత్రించడం,క్రమబద్ధమైన పొదుపు అలవాట్లను పెంపొందించుకోవడం,దీర్ఘకాలిక ఆర్థిక లక్ష్యాలను నిర్దేశించుకోవడం ఎంతో ముఖ్యమన్నారు.పెట్టుబడులు పెట్టే ముందు సంబంధిత ఆర్థిక సాధనాల గురించి పూర్తిగా తెలుసుకోవాలని,రిస్క్,రిటర్న్ మధ్య సంబంధాన్ని అర్థం చేసుకోవాలని వివరించారు.ముఖ్యంగా ఒకే పెట్టుబడి సాధనంపై ఆధారపడకుండా వివిధ మార్గాల్లో పెట్టుబడులను విభజించడం,చక్రవడ్డీ ప్రయోజనాలను పొందడం,అత్యవసర నిధిని ఏర్పాటు చేసుకోవడం,ఆర్థిక మోసాలు మరియు అధిక లాభాల పేరుతో జరిగే మోసపూరిత పథకాల పట్ల అప్రమత్తంగా ఉండటం వంటి అంశాల ప్రాధాన్యతను తెలియజేశారు.ప్రస్తుత పోటీ ప్రపంచంలో విద్యార్థులకు అకడమిక్ పరిజ్ఞానంతోపాటు వ్యక్తిగత ఆర్థిక నిర్వహణ నైపుణ్యాలు కూడా అత్యంత అవసరమన్నారు.ముఖ్యం గా ఎంబీఏ,బీబీఏ విద్యార్థులు భవిష్యత్తులో మేనేజ్మెంట్,బ్యాంకింగ్,ఫైనాన్స్,బిజినెస్ అనలిటిక్స్,ఫైనాన్షియల్ సర్వీసెస్ వంటి రంగాల్లో ఉద్యోగ అవకాశాలను అందిపుచ్చుకోవడానికి ఈ తరహా అవగాహన కార్యక్రమాలు ఎంతో దోహదపడతాయని తెలిపారు.ఈ కార్యక్రమంలో రిజిస్ట్రార్ డాక్టర్ డి.ప్రదీప్ కుమార్,డీన్-స్కూల్ ఆఫ్ మేనేజ్మెంట్ డాక్టర్ భానుశ్రీ రెడ్డి,కో-ఆర్డినేటర్ డాక్టర్ జ్ఞాన ప్రసూన,డాక్టర్ గంగిశెట్టి,అధ్యాపకులు,ఎంబీఏ,బీబీఏ విద్యార్థులు పాల్గొన్నారు.
రిపోర్టర్ : కే.ఈశ్వర్ రెడ్డి,మదనపల్లి నియోజకవర్గం ఇంచార్జి