మిట్స్లో ఆధునిక ఏఐ సాంకేతికతపై అవగాహన కార్యక్రమం : హాజరైన క్వాంటిఫై కంపెనీ టెక్ లీడ్ ఎం.పవన్ కుమార్
కురబలకోట,మేజర్ న్యూస్ : మదనపల్లి సమీపంలో గల (మదనపల్లె ఇన్స్టిట్యూట్ ఆఫ్ టెక్నాలజీ అండ్ సైన్స్) మిట్స్ డీమ్డ్ టు బి యూనివర్సిటీలోని కంప్యూటర్ సైన్స్ అండ్ ఇంజినీరింగ్ విభాగం వారు మిట్స్ ఐఐసి,ఐ.ఎస్.టీ.ఈ ఆధ్వర్యంలో విద్యార్థులకు “ఎక్స్ప్లోరింగ్ మోడల్ కాంటెక్స్ట్ ప్రోటోకాల్ (ఎంసిపి) : కనెక్టింగ్ ఏఐ విత్ ది రియల్ వరల్డ్” అనే అంశంపై శుక్రవారం ఒకరోజు వర్క్షాప్ను నిర్వహించారు.ఈ కార్యక్రమానికి ముఖ్య అతిథిగా బెంగళూరులోని క్వాంటిఫై సంస్థలో సీనియర్ సాఫ్ట్వేర్ డెవలప్మెంట్ ఇంజినీర్,టెక్ లీడ్గా పనిచేస్తున్న ఎం.పవన్ కుమార్ పాల్గొన్నారు.ఈ సందర్భంగా ఆయన మాట్లాడుతూ మోడల్ కాంటెక్స్ట్ ప్రోటోకాల్ (ఎంసిపి) అనేది కృత్రిమ మేధస్సు వ్యవస్థలను ఇతర సమాచార వనరులు,సాఫ్ట్వేర్ సాధనాలతో అనుసంధానించడానికి ఉపయోగపడే ఆధునిక సాంకేతిక విధానమన్నారు.ప్రస్తుత రోజుల్లో ఏఐ సాంకేతికత వివిధ రంగాల్లో వేగంగా అభివృద్ధి చెందుతోందని,ఏఐ వ్యవస్థలు సమాచారాన్ని సేకరించడంతోపాటు వివిధ పనులను నిర్వహించడంలోనూ కీలక పాత్ర పోషిస్తోందన్నారు.పైథాన్,జావాస్క్రిప్ట్ ప్రోగ్రామింగ్ భాషలను ఉపయోగించి మోడల్ కాంటెక్స్ట్ ప్రోటోకాల్ సర్వర్లను రూపొందించడం,ఫైళ్లు,డేటాబేస్లు,అంతర్జాల సేవలను ఏఐ అప్లికేషన్లతో అనుసంధానించడం,తక్షణమే స్పందించే ఏఐ అప్లికేషన్లను అభివృద్ధి చేసే విధానాలను ఉదాహరణలతో వివరించారు.ఏఐ అప్లికేషన్లలో సమాచార భద్రత,వినియోగదారుల గుర్తింపు నిర్ధారణ,సమాచార వినియోగ అనుమతుల ప్రాముఖ్యతను తెలియజేశారు.ఏఐ అప్లికేషన్ల అభివృద్ధి,సాఫ్ట్వేర్ పనుల స్వయంచాలక నిర్వహణ,సమాచార అనుసంధానం,క్లౌడ్ కంప్యూటింగ్ వంటి రంగాల్లో భవిష్యత్తులో మంచి ఉద్యోగ అవకాశాలు ఉన్నాయని,విద్యార్థులు సద్వినియోగం చేసుకోవాలని తెలిపారు.ఈ కార్యక్రమంలో ప్రిన్సిపాల్ డాక్టర్ పి.రామనాథన్,విభాగాధిపతి డాక్టర్ ఎం.శ్రీదేవి,కో-ఆర్డినేటర్స్ కే.సతీష్,డాక్టర్ బి.ప్రశాంత్,అధ్యాపకులు,విద్యార్థులు పాల్గొన్నారు.
రిపోర్టర్ : కే.ఈశ్వర్ రెడ్డి,మదనపల్లి నియోజకవర్గం ఇంచార్జి