మేయర్గా కుమార్తె ప్రమాణ స్వీకారం చూడకుండానే తండ్రి కన్నుమూత
అక్కయ్యపాలెం, మేజర్ న్యూస్ : విశాఖ రాజకీయ వర్గాల్లో విషాదం నెలకొంది. టీడీపీ సీనియర్ నాయకుడు, మాజీ కార్పొరేటర్ ముక్కా ముత్యాల నాయుడు (శుక్రవారం) ఉదయం గుండెపోటుతో కన్నుమూశారు. అకస్మాత్తుగా అస్వస్థతకు గురైన ఆయనను కుటుంబ సభ్యులు ఆసుపత్రికి తరలించగా, చికిత్స పొందుతూ తుదిశ్వాస విడిచారు. ఆయన మృతితో కుటుంబ సభ్యులు, బంధువులు, అభిమానులు, టీడీపీ శ్రేణుల్లో విషాదం అలుముకుంది.1983లో తెలుగుదేశం పార్టీ ఆవిర్భవించిన నాటి నుంచే పార్టీతో అనుబంధం కలిగి ఉన్న ముత్యాల నాయుడు, పార్టీ అభివృద్ధికి విశేషంగా కృషి చేశారు. స్థానిక రాజకీయాల్లో చురుకైన పాత్ర పోషిస్తూ కార్పొరేటర్గా ప్రజలకు సేవలందించారు. టీడీపీ బీసీ విభాగం ఉపాధ్యక్షుడిగా కూడా బాధ్యతలు నిర్వహించారు. దివంగత ఎంపీ ఎంవీవీఎస్ మూర్తికి ముఖ్య అనుచరుడిగా గుర్తింపు పొందారు. అనంతరం ఆయన కుమారుడు ముక్కా కిశోర్, కుమార్తె ముక్కా శ్రావణి కూడా రాజకీయాల్లో కొనసాగుతున్నారు.ఇటీవల జరిగిన జీవీఎంసీ ఎన్నికల్లో ఆయన కుమార్తె ముక్కా శ్రావణి మేయర్గా ఎన్నిక కావడంతో కుటుంబంలో ఆనందం వెల్లివిరిసింది. ఈ నెల 23న ఆమె మేయర్గా ప్రమాణ స్వీకారం చేయాల్సి ఉంది. కుమార్తె నగర ప్రథమ పౌరురాలిగా బాధ్యతలు చేపట్టే అపురూప ఘట్టాన్ని కళ్లారా చూడాలన్న తండ్రి ఆశ నెరవేరకుండానే ఆయన కన్నుమూయడం కుటుంబ సభ్యులను కలచివేసింది. ఒకవైపు కుమార్తె మేయర్గా ఎన్నికైన ఆనందం.. మరోవైపు తండ్రి ఆకస్మిక మరణం ఆ కుటుంబాన్ని తీవ్ర విషాదంలోకి నెట్టింది. ముత్యాల నాయుడు మృతి పట్ల పలువురు రాజకీయ ప్రముఖులు, ప్రజాప్రతినిధులు, టీడీపీ నాయకులు సంతాపం వ్యక్తం చేస్తున్నారు.