andhrapradesh
మరుట్లలో రిగ్గింగ్ కలకలం: బ్యాలెట్ బాక్స్ ధ్వంసం
అనంతపురం: స్థానిక సంస్థల ఎన్నికల పోలింగ్ సందర్భంగా అనంతపురం జిల్లా కూడేరు మండలం మరుట్ల గ్రామంలో తీవ్ర ఉద్రిక్తత, గందరగోళ పరిస్థితి నెలకొంది. గ్రామంలోని పోలింగ్ కేంద్రంలో అధికార టీడీపీ నాయకులు భారీగా రిగ్గింగ్‌కు పాల్పడుతున్నారంటూ వైఎస్సార్‌సీపీ శ్రేణులు, స్థానికులు తీవ్ర ఆరోపణలు చేశారు.
ఈ ఆరోపణల నేపథ్యంలో తీవ్ర ఆగ్రహానికి గురైన గ్రామీణులు, వైఎస్సార్‌సీపీ కార్యకర్తలు ఒక్కసారిగా పోలింగ్ బూత్‌లోకి దూసుకెళ్లారు. అక్కడున్న బ్యాలెట్ బాక్స్‌ను బలవంతంగా బయటకు ఎత్తుకెళ్లి, రాళ్లతో కొట్టి బద్దలు కొట్టారు. అనంతరం అందులోని ఓటు వేసిన బ్యాలెట్ పేపర్లను చింపి వేసి బయట పారేయడంతో వాతావరణం మరింత వేడెక్కింది.
విషయం తెలిసి పరిస్థితిని అదుపు చేసేందుకు వచ్చిన కూడేరు సీఐతో పాటు పోలీసు సిబ్బందిని స్థానికులు అడ్డుకున్నారు. ఈ క్రమంలో పోలీసులకు, వైఎస్సార్‌సీపీ కార్యకర్తలకు మధ్య తీవ్ర వాగ్వాదం, తోపులాట చోటుచేసుకుంది. పోలింగ్ కేంద్రం వద్ద పరిస్థితి తీవ్ర ఉద్రిక్తంగా మారడంతో అధికారులు పోలింగ్ ప్రక్రియను నిలిపివేసి, అదనపు బలగాలను రంగంలోకి దించారు.
