ముసాయిదా ఓటరు జాబితాలో పేరు లేదా? ఫారం-6తో తిరిగి నమోదు చేసుకోవచ్చు!

సిద్దిపేట, : ముసాయిదా ఓటరు జాబితాలో పేరు గల్లంతైనప్పటికీ గతంలో ఓటరుగా నమోదైన అర్హత కలిగిన పౌరులు ఆందోళన చెందాల్సిన అవసరం లేదని, తిరిగి ఓటరుగా నమోదు చేసుకునేందుకు ఫారం-6 ద్వారా దరఖాస్తు చేసుకోవచ్చని జిల్లా ఎన్నికల అధికారి, జిల్లా కలెక్టర్ కె. హైమావతి స్పష్టం చేశారు.ప్రత్యేక ఓటరు జాబితా సవరణ కార్యక్రమం (సర్-2026)లో భాగంగా విడుదల చేసిన ముసాయిదా ఓటరు జాబితాలో పేరు లేని వారు తిరిగి తమ ఓటు హక్కును పొందేందుకు ఫారం-6 సమర్పించవచ్చని భారత ఎన్నికల సంఘం స్పష్టమైన మార్గదర్శకాలు జారీ చేసిందని తెలిపారు.అయితే ఫారం-6లో మొదటిసారి ఓటరుగా నమోదు చేసుకుంటున్నట్లు పేర్కొనాల్సి రావడంతో గతంలో ఓటరుగా నమోదైన వారు కొంత ఆందోళనకు గురవుతున్నారని, ప్రజా ప్రాతినిధ్య చట్టం-1950లోని సెక్షన్ 31 ప్రకారం తప్పుడు ప్రకటనచేసినట్లవుతుందేమోనని భయపడాల్సిన అవసరం లేదని ఎన్నికల సంఘం స్పష్టం చేసిందన్నారు.వివిధ సాంకేతిక కారణాలు, ఓటరు జాబితా సవరణల కారణంగా ముసాయిదా జాబితాలో పేర్లు లేని అర్హులైన పౌరులు ఎలాంటి భయాందోళనలకు గురికాకుండా ఫారం-6 ద్వారా తిరిగి ఓటరుగా నమోదు కోసం దరఖాస్తు చేసుకోవచ్చని కలెక్టర్ పేర్కొన్నారు.అర్హత కలిగిన ప్రతి పౌరుడికి ఓటు హక్కు కల్పించడంతో పాటు ఓటరు జాబితాలో పారదర్శకత, విశ్వసనీయతను కాపాడటమే ఎన్నికల సంఘం ప్రధాన లక్ష్యమని తెలిపారు. ఈ అవకాశాన్ని అర్హులైన పౌరులందరూ సద్వినియోగం చేసుకుని తమ ఓటు హక్కును తిరిగి పొందాలని జిల్లా ఎన్నికల అధికారి, కలెక్టర్ కె. హైమావతి విజ్ఞప్తి చేశారు.