andhrapradesh
ఏపీ డీఎస్సీ నోటిఫికేషన్ విడుదల
అమరావతి:ఆంధ్రప్రదేశ్ ప్రభుత్వం ఉపాధ్యాయ కొలువుల కోసం ఎదురుచూస్తున్న నిరుద్యోగులకు తీపి కబురు అందించింది. రాష్ట్ర పాఠశాల విద్యాశాఖ మొత్తం 2,721 ఉపాధ్యాయ (డీఎస్సీ) ఉద్యోగాల భర్తీకి సంబంధించి పూర్తిస్థాయి నోటిఫికేషన్‌ను విడుదల చేసింది.
ఈ నోటిఫికేషన్ ద్వారా భర్తీ చేసే మొత్తం 2,721 పోస్టులలో జనరల్ పాఠశాలలకు 2,111, ప్రత్యేక విద్య (స్పెషల్ ఎడ్యుకేషన్) విభాగంలో 350, అలాగే వివిధ సొసైటీ పాఠశాలలకు కేటాయించిన 260 పోస్టులు ఉన్నాయి. అర్హులైన అభ్యర్థుల నుంచి దరఖాస్తుల స్వీకరణ ప్రక్రియ నిర్వహించేందుకు పక్కా ప్రణాళికను వెల్లడించింది.
నవంబరు 11వ తేదీ నుంచి 30వ తేదీ వరకు ఆన్‌లైన్ ద్వారా దరఖాస్తులను స్వీకరించనుండగా, డిసెంబరు 20 నుంచి జనవరి 13 వరకు కంప్యూటర్ ఆధారిత విధానం (CBT)లో పరీక్షలు జరగనున్నాయి. అభ్యర్థులు డిసెంబరు 14 నుంచి హాల్‌టికెట్లను డౌన్‌లోడ్ చేసుకోవచ్చని, అలాగే ఈసారి స్పోర్ట్స్ కోటా అభ్యర్థులకు కూడా రాతపరీక్ష నిబంధన వర్తిస్తుందని అధికారులు వెల్లడించారు.
