జిల్లాలో ప్రశాంతంగా జడ్పీటీసీ, ఎంపీటీసీ పోలింగ్

విజయవాడ, మేజర్ న్యూస్: ఎన్టీఆర్ జిల్లాలో జడ్పీటీసీ, ఎంపీటీసీ ఎన్నికల పోలింగ్ ప్రశాంత వాతావరణంలో కొనసాగుతోంది. గురువారం ఉదయం 7 గంటల నుంచే జిల్లావ్యాప్తంగా పోలింగ్ ప్రక్రియ ప్రారంభమైంది. ఇందులో భాగంగా నున్న మండలం బోడపాడు ఆర్సీఎం పాఠశాలలోని పోలింగ్ కేంద్రాన్ని జిల్లా కలెక్టర్ డాక్టర్ జి. లక్ష్మీశ సందర్శించి పోలింగ్ సరళిని పరిశీలించారు. అధికారులను అడిగి ఓటింగ్ శాతాన్ని తెలుసుకున్నారు. ఓటర్లతో నేరుగా మాట్లాడి పోలింగ్ కేంద్రాల్లో కల్పించిన మౌలిక సదుపాయాలపై ఆరా తీశారు.

జిల్లావ్యాప్తంగా 992 పోలింగ్ కేంద్రాల్లో 5,200 మందికి పైగా సిబ్బందితో ఎన్నికల నిర్వహణకు పటిష్ట ఏర్పాట్లు చేశారు. వీటిలో 496 కేంద్రాల్లో వెబ్‌కాస్టింగ్, సీసీటీవీల ద్వారా కలెక్టరేట్‌లోని కమాండ్ కంట్రోల్ రూమ్ నుంచి నిరంతర పర్యవేక్షణ చేపట్టారు.

గ్రామీణ ప్రాంతాల్లో ఓటింగ్‌కు ప్రజల నుంచి విశేష స్పందన లభిస్తోంది. పెద్ద సంఖ్యలో ఓటర్లు క్యూలైన్లలో నిలబడి తమ ఓటు హక్కును వినియోగించుకుంటున్నారు. గ్రామాల అభివృద్ధిని కాంక్షిస్తూ దూర ప్రాంతాల నుంచి సైతం వచ్చి ఓటు వేస్తున్నారు. మధ్యాహ్నం ఒంటి గంట సమయానికి జిల్లాలో 40.64 శాతం పోలింగ్ నమోదైంది. ఎక్కడా ఎలాంటి అవాంఛనీయ సంఘటనలు చోటుచేసుకోకుండా పోలింగ్ ప్రశాంతంగా కొనసాగుతోంది.

సాయంత్రం 5 గంటల వరకు పోలింగ్ కొనసాగుతుందని కలెక్టర్ తెలిపారు. పోలింగ్ సమయం ముగిసే సమయానికి క్యూలైన్లలో ఉన్న ఓటర్లకు టోకెన్లు అందించి ఓటు వేసే అవకాశం కల్పిస్తామని పేర్కొన్నారు. అర్హులైన ఓటర్లందరూ తప్పనిసరిగా తమ ఓటు హక్కును వినియోగించుకోవాలని, ఎన్నికల నియమ నిబంధనలు పాటిస్తూ పోలింగ్ సజావుగా సాగేందుకు సహకరించాలని కలెక్టర్ డాక్టర్ జి. లక్ష్మీశ విజ్ఞప్తి చేశారు.

స్టాఫ్ రిపోర్టర్: ✍️ ప్రేమ్ రాజ్, విజయవాడ, ఎన్టీఆర్ జిల్లా.