కూటమి అక్రమాలను అధిగమించి వైఎస్సార్‌సీపీ పోరాడింది: వైఎస్‌ జగన్మోహన్‌రెడ్డి
అనంతపురం బ్యూరో మేజర్ న్యూస్: రాష్ట్రంలో ఇటీవల జరిగిన స్థానిక సంస్థల ఎన్నికలు అక్రమాలు, అరాచకాల మయంగా మారాయని వైయస్సార్‌సీపీ అధ్యక్షుడు, మాజీ ముఖ్యమంత్రి వైఎస్‌ జగన్మోహన్‌రెడ్డి ఆరోపించారు. ప్రభుత్వం ఎన్ని కుట్రలు పన్నినా పార్టీ కేడర్‌ ఎంతో కసితో, ధైర్యంగా పోరాటం చేసిందని ఆయన కొనియాడారు. వైయస్సార్‌సీపీ అనంతపురం జిల్లా అధ్యక్షుడు అనంత వెంకటరామిరెడ్డి, నగర మేయర్‌ రమేష్‌ గౌడ్‌లతో పాటు పలు జిల్లాలకు చెందిన ముఖ్య నాయకులు తాడేపల్లిలోని క్యాంపు కార్యాలయంలో వైఎస్‌ జగన్‌ను కలిశారు. స్థానిక ఎన్నికలు జరిగిన తీరు, ఫలితాలపై ఈ సందర్భంగా సుదీర్ఘంగా చర్చించారు.
2024తో పోలిస్తే వైఎస్సార్‌సీపీకి పెరిగిన ఓటింగ్ శాతం
సమావేశం అనంతరం వైఎస్‌ జగన్ మాట్లాడుతూ.. చంద్రబాబు ప్రభుత్వ అక్రమాలను ప్రజలంతా గమనించారని తెలిపారు. ఎన్నికల షెడ్యూల్‌ ప్రకటన నుంచి ఓట్ల లెక్కింపు వరకు ప్రతి దశలోనూ అధికార పార్టీ అరాచకాలకు పాల్పడిందని మండిపడ్డారు. ఇన్ని ప్రతికూలతల మధ్య కూడా 2024 సార్వత్రిక ఎన్నికలతో పోలిస్తే వైయస్సార్‌సీపీ ఓటింగ్ శాతం పెరగడం విశేషమన్నారు. ఒకవేళ ఎన్నికలు సజావుగా, నిష్పక్షపాతంగా జరిగి ఉంటే పార్టీకి ఇంకా భారీగా ఓటింగ్ నమోదయ్యేదని స్పష్టం చేశారు. ఓటింగ్ శాతం పెరిగితే తన ప్రభుత్వం చిక్కుల్లో పడుతుందనే భయంతోనే చంద్రబాబు సరికొత్త తరహా అక్రమాలకు తెరలేపారని విమర్శించారు. వైయస్సార్‌సీపీ హయాంలో అక్రమాలు జరిగాయంటూ అసత్యాలు ప్రచారం చేస్తూ, ఇప్పుడు తాను చేస్తున్న దౌర్జన్యాలను సమర్థించుకునేందుకు చంద్రబాబు ప్రయత్నిస్తున్నారని, ప్రజాస్వామ్యం గురించి ఆయన నీతులు చెప్పడం విడ్డూరంగా ఉందని ఎద్దేవా చేశారు.
రిపోర్టర్ : మొయినుద్దీన్ అనంతపురం బ్యూరో మేజర్ న్యూస్
